IA: Naalakkersuisut oqaaseqaatigisamik killormoortuanik iliuuseqarput

Ilumoorpa aalisartut nunatta aningaasaqarneratigut amigartoornerit matussusissagaat? Naalakkersuisut nunatsinni akitsuusersueriaatsimik aaqqissuusseqqinniarnerannut pilersaarutaat apeqquserlugu, Inuit Ataqatigiit sinnerlugit Inatsisartuni ilaasortaq Ane Hansen, tusagassiuutinut nalunaarummi taama ilaatigut aperivoq.

Allattoq Mads Lynge

oktobarip 16-at 2015 07:38

- Assut tupaallappunga ernumaammerlungalu Naalakkersuisut akitsuusersueriaatsip iluarsartuuteqqinneqarnissaanut pilersaarutaat nutaajunerpaq atuarakku, Ane Hansen ilaatigut taama allappoq.

Aappaagumut aningaasanut inatsisissatut siunnersuut naapertorlugu qaleralinnik aalisarnermi akitsuusersuisoqarnissaa siunniunneqarpoq, Ane Hansenillu tamanna apeqquserpaa:

AAMMA ATUARUK VIDEO Aalisartut siulittaasuat akitsuusersuiniarnermik iluarisimaarinninngilaq

- Arlalitsigut ernumanartoqartippara. Ilaatigut aalisarnermut akitsuusersuinissaq pillugu aalajangernermi eqqugaasussat peqataatinneqarsimanngilluinnarnerattut isikkoqarnera, kiisalu Naalakkersuisut qaammatit sisamat matuma siorna oqaaseqaatigisaminnik killormoortuanik iliuuseqarnerat, tassami qaammatit sisamat matuma siorna paasissutissiissutigineqarmat qaleralinnik aalisarneq 2016-imi akitsuusersorneqassanngitsoq, Inuit Ataqatigiit aalisarnermut tunngasunut oqaaseqartittagaat Ane Hansen oqarpoq.

Akitsuusersueriaatsip aaqqissuuteqqinneqarnissaanut Naalakkersuisut siunniussaqarnerminni eqqugaasussat peqataatissimanngimmassuk taassuma pilersaarutit apeqquserpai.

IA: Naalakkersuisut oqaaseqaatigisamik killormoortuanik iliuuseqarput

Aamma atuaruk