IA: Naalakkersuisut kiffartuussinissamik isumaqatigiissut annaavaat

Greenland Contractorsip Pituffimmi kiffartuussinissamik isumaqatigiissummik annaasaqarneranut atatillugu, Naalakkersuisut qanoq akuusimatiginerat paasiniarlugu arlaannaannulluunniit attuumassuteqanngitsunit misissuisitsinissamik Inuit Ataqatigiit piumasaqaateqarput.
Allattoq Karsten Sommer
januaarip 16-at 2015 06:32
Nutserisoq Simon Uldum -

Kim Kielsenip Vittus Qujaukitsullu Naalakkersuisut siuliisa kiffartuussinissamik isumaqatigiissummik suliaqarsimanerat pillugu Inatsisartut nunanut allanut sillimaniarnermullu ataatsimiititaliaannit ippassaq sisamanngornermi isumasiorneqarnerisa kingorna taama piumasaqaateqarput.
 
- Naalakkersuisut kiffartuussinissamik isumaqatigiissut annaavaat, Inuit Ataqatigiit tusagassiorfinnut nalunaaruteqarlutik taama allapput.

- Nunanut allanut sillimaniarnermullu ataatsimiititaliami Naalakkersuisut Pituffik pillugu isumasioqatigereerlugit Inuit Ataqatigiit naliliinerat naapertorlugu Naalakkersuisut politikkikkut pisoq suusupagivallaarsimavaat. Inatsisartut suliaq kingunerisassaalu pillugit piffissaagallartillugu Naalakkersuisunit ilisimatinneqarsimanersut aamma Inuit Ataqatigiit aamma paaserusuppaat.

AAMMA ATUARUK Naalakkersuisut: Isumaqatigiissut USA-mit tamakkiisumik malinneqanngilaq

 - Ilisimavarput pisup ilarujussua qineqqusaarnerup nalaani pisimasoq, taamaakkaluartorli politikkikkut pingaarutillit pillugit attaveqatigiinneq unittariaqanngilaq. Taamanimi Naalakkersuisuugallartut partiillu akornanni pisorpassuarnik eqqartueqatigiittarsimapput – sooq una pisoq ilaasimanngila? IA aperivoq, ilaatigullu aningaasaqarnermut naalakkersuisuusimasup Vittus Qujaukitsup ilisimasanik ingerlatitseqqiisimannginnerarlugu.

AAMMA ATUARUK Pituffimmi kiffartuussinissamut isumaqatigiissummut Olsvig apeqquteqarpoq

- Isumaqarpugut uani pisumi suut tamarmik qulaajarneqartariaqartut. Tikkuartuiniarnermik siunertaqassanngilaq, kisianni aaqqissuussaanitta qaqugukkulluunniit tamatigullu nunatta soqutigisai aallunneqartuaannartussanngorlugit ilusilersorsimanissaa qulakkeerniarlugu – apeqqutaatinnagu kikkut naalakkersuisutut inissisimanersut kiisalu qineqqusaartoqarnersoq, Inuit Ataqatigiit Pituffimmut tunngatillugu arlaannaannulluunniit attuumassuteqanngitsunit misissuisitsinissamik piumasaateqarlutik allagaqaatertik taama naggaserpaat.