Politikki

URANI IA: Naalakkersuisooqatigiit uranimut killiliinissaq pillugu isumaqatigiinngillat

Inatsisartuni urani pillugu oqallinnerup ullumikkut nanginneqarnissaa sioqqullugu, Inatsisartunut ilaasortap Inuit Ataqatigiinneersup Múte B. Egedep erseqqissaatigaa, ippassaq pingasunngornermi oqallittoqarnerani partiit naalakkersuisooqataasut uranimut killiliinissaq pillugu akunnerminni isumaqatigiinngissuteqartut.

Allattoq Karsten Sommer

apriilip 28-at 2016 06:21

Nutserisoq Simon Uldum -

- Innuttaasut taasitinneqarnissaat pillugu oqallinnermi taasititsisoqarnissaanut akerliusut Nunatta patajaatsumik politikkikkut ingerlatsinissaa innarlerneqarsinnaanasoralugu itigartitsipput. Taamatulli oqaraanni akunnerminni isumaqatigiinnermik takutitsisoqarsinnaasoqassagaluarpoq, oqallinnermili akerlianik pisoqarpoq, Múte B. Egede tusagassiorfinnut nalunaaruteqarluni taama allappoq.

Aatsitassanik qinngornernik ulorianartunik akulinnik piiaanermi qummut killigititassat eqqunniakkatik pillugit Naalakkersuisooqatigiit aamma akunnerminni isumaqatigiinngissuteqarput.

Inuit Ataqatigiit oqallittoqarnerani partiinut apeqquteqarmat tamanna erserpoq.

Aamma atuaruk Lynge siunnersuummini kisimiivippoq

- Akissutillu assigiinngeqaat. Atassut 0,05 procentinut qummut killiliiniarpoq, Siumut immaqagooq 0,1 procentimut Demokraatillu immaqagooq 2 procentinut, Muté B. Egede taama allappoq.

- Taama isumaqatigiinngitsiginerat avammut aatsitassarsiornissamullu aningaasaleerusuttunut tatiginnermik pilersitsinngilaq, Inuit Ataqatigiinneersoq allappoq, Naalakkersuisullu kajumissaarpai siunertarisaminnik erseqqissumik saqqummiusseqqullugit.
Inuit Ataqatigiit‬ isumaqarput innuttaasunik taasititsinissaq patajaassusermut aqqutissaasoq.