IA marlunnik - Siumut pingasunik borgmesteriuteqalerput

Qinersineq minutsikkaarlugu ima ingerlavoq. 2017-imi kommuninut qinersinermit toqqaannartumik malinnaatitsinerput atuaqqiguk:

Nalunaaqutaq 01.37: KNR.gl-ikkut toqqaannartumik malinnaatitsinerput maanna naammassivarput. Nittartagarput ullaarnganiit nutartillattaaqqissaaq.


Nalunaaqutaq 01.15: Qaasuitsup avannaani qinersisinerit 98 prosentii kisinneqarsimalerput, kommuninngortussallu nutaat aappaanni Siumut ajugaassuusoq qularnanngilaq. 


Nalunaaqutaq 00.41: Qaasuitsup Avannaani kisitsisit kisinneqarneri ingerlallualeruttorput. Qinersisimasut affaat kisissimaneqaleruttorput, Siumullu qinersisut 59.5 procentiinik qinerneqarsimapput.

Kinali qinerneqarnerpaasimanersoq paasinissaa pissanganarpoq, Siumumimi ileqqutoqaavoq qinerneqarnerpaaq borgmesterinngortinneqartartoq.

Massakkuugallartoq Palle Jerimiassen 159-inik qinerneqarlunga siuttuugallarpoq. Ane Lone Bagger 153-inik qinerneqarluni malinnaavoq. Suli qinersinerit tamakkerlugit kisinneqanngillat. 


Nalunaaqutaq 00:21: KNR-ip ilanngutassiortuata Andreas Poulsenip Qaasuitsup Avannaani attavitsigut ajornartorsiuteqarneq oqaluttuaraa. Avannaani kommunissamit inernerit suli piariinngillat. Taamaakkaluartorli malinnaavugut.

Qinersinerit kisinnerisa 34 procentii Siumut 59 procentimik qinerneqarlutik siuaqqaneranik takutitsipput. Atassut Inuit Ataqatigiillu 15 procentinik maannamut takusinnaasatsitut qinerneqarsimapput.


Nal 00.01: Qaasuitsup kujataani Inuit Ataqatigiit 44 procentinit qinerneqarlutik siuttuugallarput, kommunimi qinersisut 90 procentii kisinneqareersut. Ane Hansen Aasianni borgmesteriusimasoq siuttuugallarpoq.

- Qujanarujussuaq tatiginninnermik taama angitigisumik tunuliaqutseratsigut. Naatsorsuutigivarput borgmesterinngortitsisinnaalluta, Ane Hansen oqarpoq. 

Taanna kommunimi nutaami siammasissumik suleqateqarluni sulinissamut piareersimavoq. 

 


Nalunaaqutaq 23.28: Kommune Kujallermi Kiista P. Isaksen Siumumeersoq qinerneqarnerpaarpasippoq. Taanna 450-inik qinerneqarpoq parteeqatiminiillu Jørgen Wæver Johansenimit Simon Simonsenimiillu qinerneqarnerulluni, taakkumi 265-inik 210-nillu qinerneqarsimapput.

Kommune Kujallermi qinersinerit 90 procentii kisinneqarlutillu akuerineqarsimaleruttorput, Siumullu 56 procentinik qinerneqarluni ajugaarpasilerpoq. Partiimilu borgmesterissaminnik qinersisussanngussapput.

 


Nalunaaqutaq 23.18: Malik Berthelsen Siumumeersoq Qeqqata Kommuniani 519-inik qinerneqarluni qinerneqarnerpaagallarpoq, taamaammallu borgmesterinngornissaa ilimanaateqarluni.

- Soorunami tupaallaatigivara taama amerlatigisunik qinerneqarama. Neriorsuutigissavara maniguullunga sulissagama, Malik Berthelsen, Inatsisartuni ilaasortaasimasoq, oqarpoq.

Taassuma qinersinerit tamakkerlugit kisinneqarnissaat utaqqeqqaarusuppaa, taamaattorli akisussaaffimmik tigusinissaminut piareersimanerarpoq.

- Borgmesterinngussaguma akisussaaffimmik tigusinissannut piareersimavunga, Malik Berthelsen oqarpoq.

Qeqqata Kommuniani Siumut 52 procentinit ikinnerunngitsunit qinerneqarpoq.

 


Nalunaaqutaq 22.52: 20.000-it kisinneqarsimalerlutillu akuerineqarsimalerput. Nunalu tamakkerlugu Siumut kinguaqqasoq takuneqarsinnaalluarpoq. Maannamut kisitsisit taamaaginnassappata partii kommunimut qinersinermut kingullermut sanilliullugu 5.7 procent pointimik kinguariaqqassaaq.

Inuit Ataqatigiillu 6.5 procent pointimik siariaqqavoq. Qinersinerpassuilli suli kisinneqartussaapput.

 


Nalunaaqutaq 22.47: Asii Chemnitz Narup Kommuneqarfik Sermersuumi qinerneqarnerpaagallarpoq, Siumullu Nuummi kinguariarsimanera eqqarsaatigissagaanni Inuit Ataqatigiit borgmesteriuteqaannarnissaat ilimanaateqarpoq.

- Soorunami inuttut nuannaarpunga. Uummammik pisumik Nuummi tunuliaqutsiisut qujaffigaakka. Nuummi ineriartortitsinissaq tunuliaqutserneqarpoq, Asii Chemnitz Narup oqarpoq.

Siorarsiorfik innutaasunit tunuliaqutserneqartoq Asii isumaqarpoq.

- Suliniummut tassungarpiaq piviusunngortitsinissamut tunuliaqutserneqarpugut,

Borgmesteritut ingerlaqqinnissaata ilimanaateqarnera nuannaarutigaa.

- Unnuarsuarmut fisternavianngilanga, aqagu qinikkat ataatsimeeqatigisussaassagatsigit, Chemnitz Narup naggasiivoq.

 


Nalunaaqutaq 22.39: Nuummi Siumut 10 procentit missaannik kinguariarpoq, taamaakkaluartoq Martha Lund Olsenip, borgmesterissatut unammillertup, kommunalbestyrelsimut isernini nuannaarutigaa.

- Qujavunga iserama. Sunniuteqaqataasinnaanissara kissaatigigakku, pingaartumik isumaginninnermut ataatsimiititaliami suleqataarusukkama. Kisianni isumaqatigiinniarnerit inerneri apeqqutaajumaarput, Martha Lund Olsen oqarpoq.

Siumut Nuummi kinguariarsimanera ajuusaarutigaa.

- Soorunami siuariarnissarput neriuutigigaluarparput, Martha Lund Olsen oqarpoq.


Nalunaaqutaq 22.32: Qinersivinnit 73-init 45-t kisinneqarsimaleruttorput, Inuit Ataqatigiit nuna tamakkerlugu 38.4 procentimik qinerneqarsimavoq. Kommunenut qinersinermut kingullermut sanilliullugu tamanna 9 procentimik siuariarneruvoq. Kisinneqarsimasulli suli akuerineqanngitsut suli amigaataapput.

Maannamut kisitsereersimalernerit Siumut 2013-imi qinersinermi kisitsisinut sanilliullugu 8.4 procentimik kinguariartoq takutippaat.

 


Nalunaaqutaq 22.23: Partiit angisuut marluk nuna tamaat isigigalugu suli naligiikannertorujussuupput. Qinersivinni 19-ini kisinneqarsimasuni akuerineqarsimasunilu 17.151-ini Inuit Ataqatigiit 38.5 procentimik qinerneqarsimapput. Siumut 39.1-imik qinerneqarsimalluni suli siuttuugallarpoq.


Nalunaaqutaq 22.22: Nuummi qinersinerit kisinneqarsimalerput. Siumukkullu kinguariangaatsiarsimasut kisitsisit takutippaat, tassalu 10 procentinik kinguariarsimallutik.

Inuit Ataqatigiit procentimik ataatsimik siuariarsimapput. 

Demokraatit 6.6 procentimik siuarsimapput.

Sulili Kommuneqarfik Sermersuumi qinersinerit affaat kisinneqanngillat, taamaammat assiliaq allanngorsinnaavoq.


Nalunaaqutaq 22.04: Kisitsisit kisinneqarneri ingerlalluartorujussuupput. Qinersinerit qinersivinnit assigiinngitsunit 12-init 14.600-t kisinneqarsimalerput. Kisitsisillu IA Siumullu naligiikannertorujussuusut takutippaat.

 


Nal. 21.54: Qinersiviit qulit qinersinerillu 8143-t maanna kisinneqarlutillu akuerineqarsimalerput. Maannamut kisinneqarsimalersuni Siumut 46 procentinit qinerneqarluni siuttuugallarpoq. Demokraatit Inuit Ataqatigiillu 20 procent missaannit qinerneqarsimapput. Atassut 11.5 procentinit qinerneqarsimapput. Qinersiviit 63 kisinneqarnissaat akuerineqarnissaallu suli amigaataapput. 

Valg.gl

 


Nalunaaqutaq 21.40: Siumukkut Nuummi imerniartarfiit ilaanni Manhattanimi katerisimaarput. KNR-ip Kim Kielsen aamma Martha Lund Olsen naapippai: 

- Qinersineq naammassivoq. Nuannersumik qineqqusaarnikuupput. Maannakkut pissanganarpoq qinersinerup inernera takunissaa, Siumut siulittaasua Kim Kielsen oqarpoq.

- Pissangaqaanga. Neriuppunga Kommuneqarfik Sermersuumi kommunalbestyrelsimut isissallunga, Martha Lund Olsen Nuummi imerniartarfiit ilaanni Siumukkut ataatsimoorfianniittoq KNR-imut oqarpoq.

KNR TV-kkut Siumut katerisimaarfianni inuit takkussuuttut takuneqarsinnaapput. 


Nalunaaqutaq 21.30: Ilanngutassiortorput, Malik Brøns partiit Nuummi ataatsimoorfiinut alakkarterivoq. Nuummi partiit taassuma nipaannerarpai.

- Partiit takkussuuttoqarnissaanut maannakkut utaqqipput. Annerusumik susoqanngilaq, tamarmilli qinersinerup inernissaat pissanngallutik utaqqivaat, Malik Brøns oqarpoq.

 


Nalunaaqutaq 21.15: Qinersiviit matuneranit akunneq ataaseq minutsillu 15-it qaangiussimalerput. Qinersivinnit sisamanit qinersinerit 1142-ut kisinneqarsimalerput. IA 49 procentimik siuarsimavoq. Siumut 28.9 procentinik qinerneqarpoq, Atassut maannamut 15.8 procentinik qinerneqarsimalluni. Partii Nalerarli aallartinnerliorpoq 1 procentiinnarnit qinerneqarsimavoq. Demokraatit 4.7 procentinik qinerneqarpoq. Sulili kisitsisit naammassiliivinngillat, sulimi kisitassaqaqaaq, taamaammat kisitsisit suli kikkut qinerneqarnerpaasimaneranik takussutissiileriinngillat.

 


Nalunaaqutaq 21.17: Ole Dorph kisiartaalluni borgmesteritut tunuanngilaq. Parteeqataa Hermann Berthelsen, Qeqqata Kommuniani borgmesteri, ukiuni 18-ini borgmesteriareerluni aamma qinersinermi matumani sassaqqinngilaq.

- Inummik allamik qinersisussaalluni eqqumiippoq, Hermann Berthelsen 1983-imili imminut qinertarsimasoq oqarpoq.

Maannali allat ingerlatitseqqinnissaannut piffissanngorsimavoq. 

- Nukiit nutaat ingerlatitseqqinnissaat pingaaruteqarpoq, Berthelsen oqarpoq.

Taassumali politikkimit tunuavinnerluni oqaatigerusunngilaa.

- Oqarnikuunngilanga politikkimi univillunga. Kommunalpolitikkimi unippunga. Politikkimi ingerlaqqikkusunnersunga piffissap takutikkumaarpaa. 


Nalunaaqutaq 21.02: Ole Dorph kommunimut qinigassanngorteqqinniarnani ukioq manna nalunaarutiginikuuaa. Qineqqusaarnani qanoq innersoq KNR-imit unnuk manna apersorneqarpoq.

- Qineqqusaarfiit tallimat qineqqusaarfiginikuuakka, qineqqusaarnerit sisamat angusiffigaakka, taamaattumik massakkut piffissanngorsoraara tunuarnissara. Politikkikkut inuunera tassunga killittariaqarpoq. Tamannalu ukiarli eqqarsaatigersuaarnikuuaara.

- Ineriartortoqarnerani malinnaanissara soqutigingaatsiarpara. Isinnilli ajornartorsiuteqarnera peqqutigalugu unittariaqarpunga.

Avannaatali kommunissaata ataatsimiititaliamik aalajangiiffigineqarnissaata tungaanut Ole Dorph ukiup naanissaata tungaanut borgmesteritut atuuffeqaqqaalaassaaq.

- Maannakkut peqqippunga, nuannaarlungalu ullut tamaasa suliartortarlunga, ukiullu sinnera aamma taama iliussaanga.


Nalunaaqutaq 20.40: Eqqaamallugu KNR1-ikkut KNR2-kkullu toqqaannartumik aallakaatitsigatta, tassanilu suleqatitta ilisimatuullu qinersinermi inernernik nassuaassinnaavaatit.

Assip ataani nutaarsiassat allat takusinnaavatit


Nalunaaqutaq 20.18: Qaqortumi 63 procentit Siumumik qinersisimasut, 29.8 procentit IA-mut qinersisimasut, 6.9 procentillu Atassummik qinersisimasut qinersisartunik isumasiuinerup exit pollip takutippaa. Qinersinerilli inerniviginngilaat tassami qinersisartunik isumasiuinerinnaagallarpoq.


Nalunaaqutaq 20.14: Ittoqqortoormiini qinersisut inernerisa kisitsisaat siulliullutik piareerneqarput. Qinersisut 54,4 procentiisa Siumut qinerpaat, 42.2 procentiisalu IA qinerlugu. 


Nalunaaqutaq 20.04: Maanna nuna tamakkerlugu qinersiviit 73 –iusut matusimalerput kisitsinissarsuarlu tullinnguuppoq.


Nalunaaqutaq 19.47:

Ittoqqortoormiini qinersineq matuvoq. Qinersisinnaasut 78 prodentii qinersisimapput.

Nalunaaqutaq 19.00 Sermersuumi qinersinerit ima isikkoqarput:

Nuummi procentinngorlugu: 45,7 procent

Paamiuni procentinngorlugu: 53,8 procent

Ittoqqortoormiini (qinersineq naammassivoq) procentinngorlugu: 78 procent

Tasiilami procentinngorlugu: 46,2 procent

Najoqqutaq: Kommuneqarfik Sermersuup facebookia

ittoqqortoormiit valgsted


Nalunaaqutaq 19.45: Nittartakkatsigut KNR.gl-ikkut toqqaannartumik malinnaatitsinissatsinnut tikilluarit. Kommuninit tallimanit inernernik unnuk manna malinnaatissinnaagassi nuannaarutigaarput. Eqqaamallugu KNR1-ikkut KNR2-kkullu aamma toqqaanartumik aallakaatitsinitsinni isiginnaaqataasinnaagavit. 


 

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!