IA: Kommunit kattussuunnerisigut naligiinnerulertoqanngilaq
Kommunit akornanni naligiinnerulernissamik suliap tigussaasumik iliuuseqarfigineqarnissaa pillugu Inatsisartut upernaaru ataatsimiinnissaanni maanna taamaammat siunnersuutigilersaarpaat.
Inuit Ataqatigiimmi isumaqarput kommunini aaqqissuusseqqinneq unittooqqasoq, ingerlaqqittariaqartorlu. Suliffissanik siammarterinikkut kommunit akornanni naligiinnerulernissamik pilersitsisoqarsinnaasoq isumaqarput, assersuutigalugulu sanaartornermut tunngasut kommuninut tamakkiisumik nuunneqarsinnaanissaat Inuit Ataqatigiit siulittaasuata Sara Olsvigip tusagassiuutinut nalunaarummi ilaatigut allaaseraa.
"Naligiimmik siunissaqarneq"-mik qulequtserlugu Kommune Kujallermi, Qeqqata Kommuniani Qaasuitsullu Kommuniani borgmesterit tusagassiortunik katersuutsitsiniarnermik nalunaaruteqaqqammersullu Sara Olsvig taama nalunaaruteqarpoq.
Kommuninik aaqqissuussinerup tamakkiisumik aaqqissuuteqqinneqarnissaata atuutilersinneqarnissaa, Siumut sinnerlugu borgmesterit pingasut taakku saqqummiunniarpaat, soorlu aamma pisortat suliffeqarfiutaasa qanoq iliornikkut illoqarfiit pingaarnersaannit nunap immikkoortaannut allanut siammarterneqarsinnaanissaat takorloorneritsik saqqummiunniaraat.