IA-ip siulersuisui ataatsimiissapput

decembarip 21-at 2004 11:12

Inuit Ataqatigiit siulersuisuunerisa Siumukkormiunik naalakkersuisooqatigiinneq ualeru ataatsimiissutigissavaat. Ataatsimiinnermi ukiuni marlunngortuni naalakkersuisooqatigiinnermi anguniagassatut siunniussat anguneqarsimanersut qiviarneqassapput nalilersorneqarlutillu.

Inuit Ataqatigiillu siulittaasuata tullia Kuupik Kleist oqarpoq ilaqutariinnermut meeqqallu atugaannut tunngasut ataatsimiinnermi qaqinneqassasut.

Nalakkersuisooqatigiinnermi isumaqatigiissutip ilaqutariinnut tunngasortaani ilaatigut allaqqavoq, issuaaneq aallartippoq:

- Ilaqutariittut inuunerup nukittorsarneqarnissaa siunertaralugu suliniutit pilersaarusiorluakkat aallaavigalugit ingerlanneqassapput, tamatumani ilaqutariinnut katsorsaaviit ilanngullugit. Issuaaneq naavoq.

Tassalu ilaqutariit meeqqallu atugaannut tunngatillugu isumaqatigiissutip itisilertinniarneqassaa allanngortinniarneqassaalu IA-kkut kissaatiginiarpaat.

Kuupik Kleist-illu erseqqissaatigaa meeqqat ilaqutariillu atugaat pillugit naalakkersuisut misissuisitsinerisa siunertarigaat pingaarnersiuilluni tulleriiaarinissamut iluaqutaanissaq. Kuupik Kleistip aamma erseqqissaatigaa naalakkersuisooqatigiinnermi suleqatigiinnerup pitsanngorsarnissaa IA-p siunertarigaa.

- Siumumi isumaqatigiinngittoqarnera suleqatigiinnermut sunniuteqarpoq aaqqinneqartariaqarlunilu. Isummersortarnerit aamma pitsaanerusumik aqqutissiuunneqartariaqarput, Kuupik Kleist oqarpoq.