IA innuttaasunik taasititsinissamik piumasaqarnissamut periarfissaqarusuttoq
Inuit Ataqatigiit uranimik qalluinissaq pillugu Kalaallit Nunaanni taasititsisoqarnissaanik piumasaqaatertik suli assorooruppaat.
Ukiaanerani ataatsimiinnissamut partii oqaluuserisassanik 32-inik siunnersuuteqarpoq, siunnersuut urani pillugu inunnik taasititsinissamik piumasaqaammik IA-mik periarfissiisinnaasoq taakkununnga ilaalluni.
Danskit tunngaviusumik inatsisaanni paragraf 42-mi Folketingimi ikinnerussuteqartut innuttaasunik taasititsinissamut periarfissinneqarput.
Tunngaviusumik inatsimmi allassimavoq inatsisissatut siunnersuut akuerineqarpat taava folketingimut ilaasortat pingasunngorlugit avikkaanni ataatsip ataatsimoorullugu inunnik taasititsinissaq piumasarisinnaavaat.
Aamma atuaruk Amerlanerussuteqartut taasititsisoqarnissaa kissaatigigaat
Tassalu inatsit taanna Inuit Ataqatigiit aamma maani Nunatsinni atuutsikkusutaat. Inuit Ataqatigiit siulittaasuat Sara Olsvig taama oqarpoq.
- Oqallinneq aallartikkumavarput, maannakkorpiaq Inatsisartut ikinnerussuteqartut aamma pisinnaatitaaffii pillugit oqallinneq aallartillugu.
Inatsisartunimi 31-nik ilaasortalimmi Inuit Ataqatigiit pingajorarterutit ilaasortaatitaraat, taakkulu inunnik taasititsinissap akuerineqarnissaanut naammapput.
Aamma atuaruk Innuttaasut taasitinneqarnissaat pillugu Inuit Ataqatigiit isumaat erseqqinngilaq
Siullermilli ilaasortat qassit taasititsinermut tunuliaqutaasassanersut oqalligineqartariaqarpoq, imaassinnaavormi Inatsisartuni, Folkertingimit ilaasortakinnerusumi, pingajorarterutit taama piumasaqarsinnaassappata ikippallaartut, Sara Olsvig oqarpoq.
- Aaqqissuutissaq nunatsinnut tulluarnerpaaq uani ujartorusupparput. Tunngavigisarput tassaavoq, Inatsisartuni ilinnerusuteqartut ataatsimut isigalugu aamma arlaatigut pisinnaatitaaffeqarnissaat.
Aamma atuaruk Urani pillugu siunnersuutiip aappaa akuerineqarpoq
Siunissami kalaallit tunngaviusumik inatsisitaarnissaata suliarineqarnissaanut taassuma oqallisigineqarnissaa pissusissamisuuginnartoq, Sara Olsvig oqarpoq.
Ukiaanerani ataatsimiinneq septembarip 16-ianni aallartissaaq, Inuit Ataqatigiillu siunnersuutaasa ilaat taanna oktobarip qulinganni siullermeerneqassaaq.
