IA: Ilaqutariit meerartallit akileraarnikinnerussapput

Ilaqutariit meerartallit akileraarnermi ilanngaataat qaffanneqassasut Inuit Ataqatigiit ippassaq apeqqarissaarfineqarnerminni saqqummiuteriatarpaat.
Allattoq Jens Thorin
maajip 27-at 2009 14:27

- Pingaarnerpaavoq, ilaqutariit meerartallit inuuniarnermikkut atugaasa oqilisaaffigineqarnissaat, partiip siulittasua, Kuupik Kleist, oqarpoq.

- Akileraartarnermut tunngasutigut periarfissarpassuit akornanni massakkut siunnerfigisarput taassaavoq, ilaqutariit meerartallit ilaqutariit akileraarnermi ilanngaataat qaffanneqarsinnasoq qassineq meeraqarneq naapertorlugu, Kuupik Kleist taama oqarpoq.

Akileraarnermi ilanngaat maanna 48.000 koruuniupput, saniatigullu inummut ilanngaat 10.000 koruuniulluni. tamaasa katikkaanni 58.000 kronuunit angugaanni aatsaat akileraartoqartarpoq.

Inuit Ataqatigiit siunnersuutigaat, ilaqutariit ataatsimik meerartaqarunik, akileraarnermi ilanngaataat 5000 koruuninik qaffanneqassasut, malunnillu meerartaqarunik 10.000 koruuninik. Tassalu meerartaqarluartut akileraarutaat malunnaatilimmik apparsinnaapput.

- Tassa Inatsisartuni nutaani arlaatigut amerlanerussuteqarsinnaasutut takorluukkatsigut oqilisaassisinnaaneq aqqutissiiuunniarparput.

Kisianni akileraartartut ilaasa akileraarutaat millippata, Nunatta Karsianut isertitat aamma ikilissapput. Taamaammat arlaatigut ileqqaartoqartariaqarnera Kuupik Kleiast-p nassuerutigaa.

- Kisianni ilaqutariit imminnut napatinnissaminnut piginnaanerisa qaffakkiartorneratigut naatsorsuutigaarput, pisortat ikiorsiisarnermut aningaasartuutaat annikilliallassinnaasut.

Aamma imaassinnaavoq, tamatuma saniatigut sipaarniutinik allanik ujarlertoqartariaqassasoq. Kisianni takussuvarput, naatsorsueqqisaarnikkut tamanna qanoq pisariaqartigissanersoq. Kisianni uagut pingaarnerutipparput, ilaqutariit meerartallit inuuniarnemikkut atugaasa oqilisaaffigineqarnissaat, Kuupik Kleist oqarpoq.