IA Demokraatillu danskit tusagassiorfiinit ilimagineqarput

Ministeriuninngorniuuttunut marluusunut tapersersuinerup assigiinngissusaasa annertussusaat suujunnaaraluttuinnarpoq taamaattumillu Nunatsinniit Savalimmiuniillu qinigaasussat kikkut qinersinermi ajugaanissaannut aalajangiisuusumik sunniuteqarnissaat ilimanarsigaluttuinnarpoq.

Nunatsinni qinersisartunik isumasiuisoqarneq ajormat, qallunaat tusagassiorfiisa oqaaseqartartuisalu nalilersuinerat eqqoriaanermik tunngaveqakkajuttarpoq. Nunatsinni aviisit annersaasa marluusut isumaqatigiillutik, maanna nalunaarutigaat, ukiuni kingullerni qulikkaani saamerliuiniat Nunatta ilasortaatitaanit tapersersorneqartaraluarnerat, maannakkut taasinerit kisinneqareeriarpata allanngorumaartoq.

- Demokraatit maannakkut Naalakkersuisuini ilaasortaatitaqartut, inissat aappaat tigoriaannaavaat, aviisi Berlingske taama allappoq.

Aviisimit talerperliunianut qaninniartuusumit  ilaasortaatitatta aappaata Demokraatinit "tiguneqaratarsinnaanera" oqaatigaat, taamaalillunilu Helle Thorning Schmidtip saamerliuiniallu nunatsinneersunit immikkut ittumik naatsorsuuteqarnerat pisinnaajunnaassaaq. Aamma aviisip naalakkersuisunut isornartorsiuisartup Politikenip pingaarnertut allaaserisaani taamatorpiaq naliliisoqarpoq.

- Kalaallit Nunaanni saamerliit ilaasortaatitaasa aappaat Siumup Demokraatinut, socialliberaliusunut - killilersuerusunngissusermik aammali isumageqatigiinnissamik tunngaveqartunut, kinalu ministeriunertut toqqassamaarnerlugu suli aalajangersimanngitsunut, kisiannili qinersereernerup kingorna Kalaallit Nunaannut pitsaanerpaamik iliuuseqarusuttunut tapersersuiniartunut annaariaannaavaa, Politiken allappoq.

Aammattaq aviisimit qularineqanngilaq Sara Olsvig, Inuit Ataqatigiit sinnerlugit qinigassanngortittoq qinigaassasoq, aammalu Siumumeersoq Doris Jakobsen qinigaaratarsinnaasutut, Folketingemut qinersivinni tamani ataatsimut naliliinermi erserpoq. Demokraatineersumut Niels Thomsenimut tullinnguulluni aamma Siumumeersoq Nick Nielsen aamma ilimanaateqarsinnaasutut nalilerneqarpoq. Nalilersuinertilli sumik tunngaveqarnersoq aviisit eqqaanngilaat.

Savalimmiuni qinersisartuni isumasiuisoqarmat, talerpilliit saamerliillu tamarmik ataatsimik  ilaasortaatitaqarlernissaat ilimagineqalerpoq.