IA & D: Clinton nunatsinnut pitsaanerussaaq
USA-mi novembarip qaammataa præsidentimut qinersisoqassaaq, Donald Trumpilu sapaatip akunnerata siuliani republikaneriniit pisortatigoortumik qinigassanngortinneqarpoq, Hillary Clintonilu demokraatiniit pisortatigoortumik ippassaq qinigassanngortinneqarluni.
Barack Obamallu Det Hvide Husimi kimit taarserneqarnissaanut nunatsinni partiit Inuit Ataqatigiit Demokraatillu neriuuteqarnertik qularutiginngilaat.
- Pissangalluta taasineq malinnaaffigaarput, neriuutigaarpullu Hillary Clinton Demokraatineersoq qinersinermi ajugaajumaartoq, politikkikkut oqaaseqartartoq nunanut allanut sillimaniarnermullu ataatsimiititaliami demokraatiniit ilaasortaq Justus Hansen oqarpoq,
Taanna isumaqarpoq Hillary Clinton præsidentitut toqqarneqarpat nunatta iluaqutiginerpaassagaa, USA-mimi Demokraatit silap pissusiata allanngoriartornera samminerusarpaat.
- Neriuutigaarput naatsorsuutigalugulu nunanut allanut politikki issittumut atuuttoq silap pissusiata allanngoriartorneranut atatillugu Obamap nakkutigilluagaa Hillary Clintonip malikkumaaraa.
Republikanerit præsidentimut qinersinissaq sioqqullugu qinersineri Justus Hansenip malinnaaffigai, ernummatigaalu Donald Trumpip Obama Det Hvide Husimi paarlassappagu susoqassanersoq.
Demokraatimmi politikkikkut oqaaseqartartuat naapertorlugu Trump issittumut tunngatillugu soqutiginninnginnerminik takutitsivoq.
- Erseqqilluinnartumimmi oqariartuutigaa USA kiserpiaviat samminiarlugu.
Inuit Ataqatigiiniillu aamma qularineqanngilaq, Nunatsinnut aammalumi USA-mut pitsaanerpaassasoq Hillary Clintonip qinersineq ajugaaffigippagu.
- Soorunami saamerliunerusut, tassa Demokraatit, Inuit Ataqatigiinni neriuutigaarput, Sara Olsvig oqarpoq.
Ilanngullugulu IAp siulittaasuata Sara Olsvigip pingaartippaa, Clintonip unammillertaata Bernie Sanderip Demokraatit præsidentinngorniuunneq sioqqullugu taasineraani demokraatit saaviatungaaniinnerulersimmagit.
USA-mili Novembarimi qinersineq qanorluunniit inerneqaraluarpat, nunatta Naalagaafferujussuarmik suleqateqaannarnissaa Inuit Aataqatigiit siulittaasuata pingaartippaa. Kisianni:
- Politikkikkut issittumut tunngasuni Hillary Clinton ammanerussasoq takorloorpara. Taannalu nunatsinnut tunngasunik suleqatigiinninniarnermi ajunnginnerpaamik inissisimasinnaassasoq, IA-p siulittaasua Sara Olsvig oqarpoq.
