IA: Borgmesterip ajornartorsiut nassuerutiginngilaa
Meeqqat illersuisuata ajornartorsiutit tikkuartugai, piviusuupput nassuerutigineqartariaqarlutillu, Inuit Ataqatigiit sinnerlugit Qaasuitsup Kommuniani kommunalbestyrelsimi ilaasortaq Bendt B. Kriatiansen, aamma kommunip isumaginninnermut ataatsimiititaliaani ilaasortaasoq allappoq.
Taassuma Jess Svanep Siumumi gruppeformanitut nassuiaataa ilumoornerarpaa, tassalu kommunalbestyrelsimi partiit ilaasortaatitaqartut tamarmik MIO'p nalunaarusiaa naammagisimaaraat iluarisimaarlugulu.
- Borgmester Ole Dorphip tusagassiuutinut nalunaarummini MIO-mik isornartorsiuinera akuerineqarsinnaanngilaq. Imatut paasineqarsinnaavoq ajornartorsiutinik ilisimasaqanngitsutut.
- Meeqqanut ilaqutariinnullu kommunip ukiumut aningaasartuutigisartagai 80 millioner koruunit sinneqarmata nalaatsornerunngilaq. Aamma meerarpassuit angerlarsimaffiup avataanut inissinneqartarnerat nalaatsornerunngilaq. Isumaginninnermut ataatsimiititaliap ajornartorsiutit ilisimaarilluarpai.
Aamma atuaruk Meeqqat Illersuisuata isornartorsiuinera akuerinngikkaat
Aamma atuaruk Meeqqat Illersuisuata isornartorsiuineq akerlilerpaa
MIO'p nalunaarusiaa Upernavimmut nunaqarfiinullu aammalu Uummannamut nunaqarfiinullu tunngassuteqarpoq. Kommunalbstyrelsimulli ilaasortap erseqqissarpaa ajornartorsiut tamaanga killeqanngitsoq.
Qaanaami Ilulissanilu ajornartorsiutit annertoorujussuupput. Tusagassiuutit aqqutigalugit assortuunnani suleqatiinneqartariaqarpoq.
- Ilumoorullugu assigiinngitsutigut suliniuteqarpugut, suliniutillu annertusarniarlugit. Assersuutigalugu isumaginninnermut ataatsimiititaliaq meeqqanut ilaqutariinnullu pinaveersaartitsinermik annertusisamik suliniuteqarpoq. Tamanut ammasumik MIO-mik tatiginninnginnini takutikkamiuk allaanngilaq suliniut tamanna borgmesterip ilisimasaqarfiginngikkaa, Qaasuitsup Kommuniani Inuit Ataqatigiit sinnerlugit ilaasortaasoq Bendt B. Kristiansen taama allaaserisaqarpoq.
