IA: Atassut imminut assortorpoq
Tamannami Inuit Ataqatigiit naapertorlugit Tunumi imigassanik kimittuunik nioqquteqarnerup killilersorneqarnerata atorunnaarsinnissaanik Atassutip kommunalbestyrelsimi ilaasortaatitaata Erling Madsenip qaammatit tallimat matuma siorna siunnersuuteqarneranut naapertuutinngilaq.
Taamaammat Steen Lyngep imigassamik nioqquteqarnerup matuvissorneqarnissaanik siunnersuuteqarnera tupaallaatigaat.
- Taamatut nalunaaruteqarnerit, Atassutillu partiitut killilersuinermik tapersersuinngitsutut inissisimarusuttarnera tunngavigerpiarlugit, Steen Lyngep taamatut nalunaaruteqariasaarnera gruppitsinni tupigusuutigaarput.
Kommuneqarfik Sermersuumi kommunalbestyrelsimi Inuit Ataqatigiit ilaasortaatitaata gruppianni siulittaasoq taama oqarpoq.
Aaqqiissutissaanngitsoq
IA-p kommunalbestyrelsimi ilaasortaatitaata Tunumi imigassamik nioqquteqarnerup killersuiffigineqarnerata atorunnaarsinneqarnissaa isumaqataaffiginngikkaluarlugu imigassamik nioqquteqarnerup matuvissorneqarnissaanik siunnersuut tapersersunngilaat.
- Aaqqiissutissaasorinngilarput. Tasiilami ajornartorsiutigineqartut assigiinngitsorpassuupput, aaqqiissutissallu assigiinngitsorpassuit pisariaqartinneqarput, taakkulu innuttaasut sunniuteqaqataaffigisariaqarpaat. Qulaatiinnarlugit oqarfigisinnaanngilagut; aqussinnaannginnassiuk matuarput. Tamanna isumaqataaffiginngilarput, Malene Lynge KNR-imut taama oqarpoq.
Steen Lynge oqaaseqartinniaraluaratsigu iluatsinngilarput, Knud Kristiansenili tusagassiorfinnut nalunaaruteqarluni Inuit Ataqatigiit Sermersuumi kommunalbestyrelsimi ilaasortaatitaanut erseqqissaatigaa nunap iluani nunalu tamakkerlugu politikkerneq taputartuunnaveersaassagaa.
Atassutillu siulittaasuata aamma erseqqissaatigaa Steen Lyngep siunnersuutaa oqallissaarutitut isigineqassasoq.
- Taamaattumik isumaqanngilaq, partiimi sammiviit arlallit tunaartarineqartut, Knud Kristiansen tusagassiorfinnut nalunaaruteqarluni taama allappoq.