IA aaqqissuusseqqinnissanik tigussaasunik ujartuisoq

Aningaasanut inatsisissatut siunnersuut aaqqissuusseqqinnissamut siunnersuutissanik imakippallaarpoq. Aningaasanut inatsisissatut siunnersuut tallimanngormat saqqummiunneqareersorlu, Inuit Ataqatigiit siulittaasuat Sara Olsvig taama qisuariaateqarpoq.
Allattoq Ivik Kristiansen
februaarip 24-at 2015 10:04
- Aaqqissuusseqqinnissat pisariaqavissut taakkartorneqaraluarput, kisianni tigussaasumik tikkuussisoqanngilaq qanorpiaq taakkua iliuuseqarfiginiarnerlugit, Sara Olsvig oqarpoq.
 
Naalakkersuisut atuutileramilli aningaasanut inatsisissatut siunnersuutissap suliarinissaanut qaammatit pingajuat affaq taamaallaat periarfissaraat.
 
Tamanna piffissarujussuunngilaq, taamaakkaluartoq aningaasaqarnermutt naalakkersuisup Andreas Uldumip tallimanngormat saqqummiussaa, Inuit Ataqatigiinnit amigaateqarsorineqarpoq.

AAMMA ATUARUK Aningaasanut inatsimmi 50 millionit sipaarniarpaat

Ingammik akileraartarnermik aaqqissuusseqqittoqarnissaanik allaqqasoqannginnginnera Sara Olsvigip paamitsassutigaa.
 
- Pappilissani uagut tigusatsinni 2016-imut  anguniakkaminnik aamma saqqummiussipput. Taamaammat tassani tikkuussereersinnaasimagaluarput piffissami tassani naammattumik 2016-p tungaanut suna piareersarniarnerlugu.
 
- Tassanilu akileraartarnermik aaqqissuusseqqinnissaq aamma taaneqanngilaq. Taamaammat neriuppugut 2016-imi ilanngunneqarumaartoq, Sara Olsvig taama oqarpoq.
 
 
Aningaasaqarnikkut inissisimaffik imaannaanngitsoq
Inuit Ataqatigiit isornartorsiugassaqaraluarlutik aningaasanut inatsisissatut siunnersuutissap siornatigut  pilersaarusiarineqarneranut naleqqiullugu allanngorsimasoq Inuit Ataqatigiit isumaqarput.
 
- Nuannaarutigisatta ilaat tassaavoq Naalakkersuisuninngaanniit aamma erseqqissumik ukiarmisut oqaatigineqarmat Nunatsinni aningaasaqarnikkut inissisimanerput imaannaanngitsuusoq, taamaammallu aamma tigussaasunik iliuuseqartariaqartoq, Sara Olsvig taama oqarpoq, qineqqusaarnermi oqaluuserineqaraluaqisut maanna aningaasaliiffigineqassannngitsut siunnersuutaasoq assersuussiullugu.

AAMMA ATUARUK Anda Uldum: Ataatsimoorluta qajaq makitissavarput

- Mittarfiliornissanut tunngasoq, aningaasaliissutit tassunga ukiarmi immikkoortinneqartussaasutut nalunaarsorneqarsimagaluartut uani saqqummiunneqartumi peerneqarsimapput. Imaanngilaq nuannaarutigipput, kisianni maluginiarparput. Tassanilu massakkut piviusorsiorneruneq pissusissamisoortoq isumaqarpugut, Inuit Ataqatigiit siulittaasuat Sara Olsvig taama oqarpoq.
 
 
Namminersorlutik Oqartussat 50 millionit koruuninik sipaarfigineqarniarpoq
Aningaasanut inatsisissatut siunnersuummi ukiumut 50 millionit koruuninik sipaaruteqartarnissaq ilaavoq. Sara Olsvigip taamaattoqarnissaa pissusissamisuuginnartutut isigaa, isumaqarporli, innuttaasuni atugarliornerpaat sipaarniarnermi eqqornaveersaarniarlugit pingaarnersiueqqissaartoqartariaqartoq.
 
Partii illuatungiliuttut aappaat, Partii Naleraq, KNR-imit ippassaq oqaseqartinniaraluarparput, aningaasanulli inatsisissatut siunnersuut misissorluarsimannginnamikku suli oqaaseqarusunngillat.