Hudsonimut isumaqatigiissut: Taarnermi qaamaneq
Hudson Resourcesimut piiaanissamik akuersissutip aammalu IBA-p (Impact and Benefit Agreement, aaqq.) atsiornerisigut Nunatta aatsitassanik piiaasoqarfittut inissisimaleqqinnissaanik takorluugaq qanillattoqqinneqarpoq.
AAMMA ATUARUK Qeqqata Kommuniani piiaaviliornissaq akuersissutigineqartoq
Naalakkersuillumi oqalugiaataanni nuannaartoqarnera aamma tusaaneqarsinnaavoq.
- Atortussiassat aammalu saviminissat arlalippassuit niuernermi akiisa ukiuni kingullerni appariartorneri pissutigalugu aatsitassanik piaanermik ingerlatsinerit iluanni suliat appariartoraluartut, taamaattoq suli qaamasoqarpoq – aamma Kalaallit Nunatsinni, Vittus Qujaukitsoq atsioqatigiinnermi taama oqarpoq. Atsioqatigiinneq Nuummi Sisimiunilu ataatsikkut pivoq, borgmester Hermann Berthelsen aamma Hudson Resources Sisimiuniillutik.
AAMMA ATUARUK Qaammatip ujarai Kangerlussuup qinnguaneersut Europaliaassorneqarsinnaasut
Piiaavissap aappaagu sanaartuiffigineqarnissaa 2017-imilu tamakkiisumik tunisassiorfiulernissaa naatsorsuutigineqarpoq.
IBA naapertorlugu, sanaartornermi sulisorineqartut 50 procentii nunaqavissuussapput, anguniagaavorlu piiaanermi ukiut pingajussaata ingerlanerani sulisorineqartut 80 procentii nunaqavissuussasut. Suliniummi 2017-imit siunissamut katillugit inuit 61-it sulisorineqarnissaat naatsorsuutigineqarpoq.