'Homo Sapienne' nersornaaserneqanngitsoorpoq

Aviisip ullormut saqqummersinneqartartup, Politikenip Atuakkiortunut nersornaasiuttagaa, pingajussaanik maanna agguaanneqarpoq.

Aviisip Politikenip atuartartuisa ajugaasussatut toqqarpaat, danskip Jens Andersenip atuakkiaa, 'Denne dag - Et liv'. Atuakkiami tassani piviusulersaarummi, svenskip atuakkiortup tusaamasap, Astrid Lindgreenip inuunera eqqartorneqarluni.

Astrid Lindgreenip atuakkiai tusaamasaasut, Pippi Langstrømpe, Emil fra Lønneberg, Kalle Blomquist allallu meeqqanut inuusuttunullu tunngasut torrallataasutut oqaatigineqartarput. Astrid Lindgreenip atuakkiornermini qaamanerup taartullu nukigi allaaserisarpaalusooq aamma meeqqat assoralisimaartut aninguiffissaqartartut upperalugit atuakkiarisarlugit.

Politikenip Atuakkiortunut nersornaasiuttagaa tassa ukioq manna pingasjussaanik agguaanneqarpoq. Ukiut marluk matuma siorna nersornaaserneqarpoq danskit affarmik norskiusoq aamma Nunatsinni peqqissaasutut sulisimasoq, Kim Leine. Taassuma atuakkiaa 'Profeterne i Evighedsfjorden' ajugaatinneqarluni.

Siorna nersornaasigaasoq tassaavoq, Yahya Hassan, taassuma taalliai ajugaatinneqarlutik.