Hermann Kangerlussuarmi umiarsualivissap aningaasaliiffigineqarnissaa pillugu: Soorunami Inatsisartut aalajangissavaat
- Soorunalimi Inatsisartut tamanna aalajangertussaavaat, Hermann Berthelsen KNR-imut oqarpoq.
Kangerlussuarmi umiarsualiviliornissamut aningaasanut inatsisitigut 50 millionit koruuninik aningaasaliissuteqartoqarnissaa isumaqatigiissutigineqarsimasoq, Qeqqata Kommuniani kommunalbestyrelsi tusagassiuutinut sapaatit akunnerata siuliani nalunaaruteqarpoq.
Naalakkersuisulli siulittaasuat Kim Kielsen, tamassumunnga erseqqissaassuteqartariaqarsorisimavoq, aningaasaliinissamullu isumaqatigiissuteqartoqarsimanngitsoq tusagassiuutinut nalunaaruteqarluni.
Aamma atuaruk Kim Kielsen 50 million kr-nik neriorsuuteqarsimanngilaq
Inatsisartulli tamatuminnga suliaqarnissaat naammassiinnagassaasoq, Hermann Berthelsenip neriuutigaa.
- Taannartaa suli aalajangiiffigineqanngitsoq tamatta nalunngilarput. Taamaammajuna nuannaarutigigipput, Naalakkersuisut siulittaasuata tusagassiuutinut nalunaaruteqarnermini soorululi taperserluta aamma oqartoq, Inatsisartut aalajangigassaattut saqqummiutissallugu. Taamaammat Inatsisartut taamannak aalajangiiumaartut neriuppunga, Hermann Berthelsen oqarpoq.
Inatsisartut akuersissasorigai
Inatsisartullu allamik isummernissaat, borgmesterip takorlooruminaatsippaa.
- Illoqarfiit annersaasa aappaanut nunaqarfittaanullu sanaartornermut aningaasaliissutit 1,4 millionit koruuninik kisimik immikkoortinneqarput, illoqarfiilli annersaanut nunaqarfiinullu qanittuinut 209,8 millionit koruuninik immikkoortinneqarlutik, Hermann Berthelsen tunngavilersuilluni tusagassiuutinut nalunaarummi nutaami oqarpoq.
Ataatsimut nalunaaruteqarneq pitsaanerussagaluartoq
Kommuni Naalakkersuisullu assortuuppaluttumik siornatigut nalunaaruteqaraluarlutik assigiimmik oqariartuuteqartut, Hermann Berthelsenip unnerpaa, ataatsimulli nalunaaruteqarsimasuugunik pitsaanerussagaluartoq nassuerutigaa.
- Tamatta ataatsimut nalunaaruteqarsimagaluarutta pitsaanerpaajusimassagaluarpoq. Kisianni sapaatit akunnera sinnerlugu missaani uninngasimavoq, taamaammat Qeqqata Kommunianinngaanniit isumaqarsimavugut, uagut Qeqqata Kommunianit avammut nalunaaruteqarnissarput, Qeqqata Kommuniani borgmesteri Hermann Berthelsen oqarpoq.