Helmsip suliani annikillisinniarpai
Atuakkiortoq nunatsinnullu atorfilittaq misilittagaqarluartoq, Hans-Jakob Helms atuakkiami kingulliup, pinerluttulersaarutip "De dødes fjord"-ip Jylland-Postenimi uani sapaatip akunnerani nalilerneqarluarnera nuannaarutigisinnaavaa.
Atuagaq Pituffik pillugu atuakkiaavoq, Kalaallit Nunaanni Kenyamilu pisimasuusaartinneqarluni. Pinerluttulersaarut politikkikkut tunngasunit pissanganartuliaavoq iluatsilluartoq, naliliisoq taama allappoq. Aviisimilu Jyllands-Postenimi ullorissanik annerpaamik arfinilinnik pissarsiffiusumi tallimanik nalilerneqarluni.
Imminut piffissaqarfigerusuppoq
Hans-Jakob Helms ukiorpassuarni Siumup folketingimut ilaasortarisaanut allaffimmi pisortaasimasoq maanna taarserneqarnissani qinnutigisimagaa, Atuagagdliutit allaaserisaqarpoq.
Aviisimmi maluginiarsimavaa, maanna Siumumit folketingimut ilaasortaatitaq Aleqa Hammond allattoqarfimmini aqutsisussamik nutaamik ujarlertoq.
Helms AG-mut nassuiaavoq, suliani annikillisinniarlugit atuakkat amerlanerusut allaaserisinnaaniassagamigit imminullu piffissaqarfiginerulerluni.
Aamma atuaruk Hans Jakob Helms soraarsitaavoq