FOLKETINGIMUT QINERSINEQ Helle Thorning-Schmidt partiillu saamerliit aallartilluartut
Naak isumasiunerit tamatigut kisitsisinik assigiinngitsunik saqqummiisaraluartut, taamaattoq kisitsisit saqqummiussat amerlanerit takutippaat, Helle Thorning-Schmidti taassumalu partiit illersortaat aallartilluartut.
Tamanna takuneqarsinnaavoq isumasiuinerit kingulliit, Ritzau-ip Danmarks Radio-llu eqqartugaanni. Tassa partiit saamerliit isumasiuinermi 50,4 procentinit qinerneqartussatut ilimagineqarmata partiillu talerperliit, Lars Løkke Rasmussenimit siuttuuffigineqartut, 49,7 procentinit qinerneqartussaasut ilimagineqarlutik.
Aviisip Berlingske taamatullu Børsenip allaaserisaanni inernerit allaanerupput. Aviisini taakkunani takuneqarsinnaavoq, partiit talerperliit 50,5 procentinit qinerneqartussatut ilimagineqartut saamerliillu 49,5 procentinit qinerneqartussatut ilimagineqarlutik.
AAMMA ATUARUK Attaveqaqatigiittarfinni #glpol pillugu nutaarsiassat kingulliit
Isumasiunerilli tamarmik takutippaat, Socialdemokraatit Venstrenut sanilliullutik folketingimi ilaasortaatitassaat amerlanerussasut.
Isumasiuinernili kisitsisini saqqummiunneqartuni, Savalimmiormiut Kalaallillu ilaasortaatitassat ilanngunneqarneq ajorput. Ileqquulersimasormi malillugu Nunatsinnit Savalimmiuniillu ilaasortat marluk saamerlernik suleqateqartarput, taamatullu pisoqaqqissagaluarpat, Thorning ministeriunertut ingerlaqqittussatut isikkoqarpoq.
Qinersinissarli aatsaat ullut 18-nit qaangiuppata pisussaammat isumasiuinerni kisitsisit allanngoranngitsoornavianngillat.