Hedstedvesterimut aallartitsisarunnaassapput
Inissiisarfik matoqqarsoq piareerpat kalaallit killiligaanngitsumik pineqaatissinneqarsimasut Herstedvesterimut Danmarkimiittumut aallartinneqartarunnaassapput.
- Ukiut 30-it sinnerlugit kissaatigereernikuullutigu kiisami piviusunngortinneqarlerpoq. Inissiisarfiullu matoqqasup pilersinneqarnissaanut alloriarnerlu siulleq pimmat ulloq persuarsiorfigaarput, Pinerlussimasunik isumaginnittoqarfimmi pisortamut tullersorti Annette Esdorf oqarpoq.
Qaartsitsineq siulleq malunnartinniarlugu Pinerlussimasunik isumaginnittoqarfimmi aallartitat nunatsinneersut qallunaat nunaaneersullu najuupput.
Pinerlussimasunik isumaginnittoqarfimmi Nunatsinni pisortap erseqqissarpaa, pinerluuteqarsimasut pillugit sanaartortoqalermat.
- Massakkut suliaq pingaarutilik nunatsinni aallartippoq. Sullitavut kalaallit nunaanni sullissinnaanngoratsigit, Hans Jørgen Engbo taama oqarpoq.
Politiinut oqilisaataassaaq
- Politiit sivikinnerusumik angallassisalissapput. Inissinneqartussat tigusallu ungasissumut angallattarunnaassavagut, uanilu pinerlussimasut Danmarkimukaanneqartarunnaartussat eqqarsaatigaakka. Tamakkua sivikinnipilussuarmik angallattalissavagut, tamannalu politiinut iluaqutaassaaq, Politimesteri Bjørn Tegner Bay KNR-imut oqarpoq.
Aamma atuaruk Inissiisarfittaassap sanaartornissaanut qaartitsineq siulleq ullumi pissaaq
Pinerluttunik isumaginnittoqarfiup pisortaata oqaatigaa sanaartornikkut pineqaaatissineqarsimasut pitsaanerusunik atugassaqartinnissaat siunertaasoq.
- Pineqaatissinneqarsimasut ulluinnarni qammarsuit iluinnaani inuuneqassapput. Taamaammallu illorsuit ulluinnaallu aaqqissuuttariaqarpagut, naliginnaasumik inuuneqarfiusinnaanngorlugit, suliffiusinnaanngorlugit, ilinniarfiusinnaangorlugit, sunngiffimmi sammisaqarfiusinnaanngorlugit, naalagiarfiusinnaanngorlugit, allanilu naliginnaasumik inuuneqarnermi atuuttuni atorsinnaanngorlugit, Hans Jørgen Engbo taama oqarpoq.
Aaqqissuusinerit marluk atorunnaassapput
- Kalaallinik Hertedvesterimut aallartitsisoqaqqissanngilaq. Herstedsvesterimiittut piumagunik Danmarkimiiginnassapput kisianni pineqaatissinneqartunik allanik Danmarkimut aallartitsisoqaqqissanngillaq. Inissiisarfik ukiut pingasut qaangiuppata piareerpat inissiisarfik Hertedvesterimiittoq pisoqalisimasoq nutaamilu neqeroorutigisinaasatsinnik periarfissaqanngitsoq matuneqassaaq, Annette Esdorf oqarpoq.
Inatsisinik atuutsitsinermut naalakkersuisoq Mala Høy Kuko ulloq nunatsinnut pingaaruteqartuusoq isumaqarpoq.
- Taamaammat naalakkersuisuninngaanniit nuannaarutigisorujussuuarput pineqaatissinneqarnikuusut qallunaat nunaaninngaannit maanga kiisami nuantsinniilersinnaanissaat assut qujarunnarput.
