Hashitortarneq bingortarnerlu ajornarsiutaajartuinnalersut
Nunatsinni imigassamik aalakoornartulimmik atuineq 90-ikkunniilli milliartuinnaraluartoq, pingaartumik angutit 18-init 24-nut ukiullit akornanni hashimik atuineq piffissap ilaani annertusisimavoq, taakku pingasorarterutaat hashimik assigiimmik pisartumik atuisuullutik. Tassalu ikinnerpaamik qaammammut ataasiarlutik hashimik pujortartartuupput.
Arnalli akornanni hashimik atuineq milliartuinnarsimavoq, pingaartumik inuusuttut akornanni. Hashimik atuinerpaasut tassaapput 35-t 59-illu akornanni ukiullit, taakku qulingiugaangata ataaseq hashimik aalajangersimasumik pisartumik atuisuulluni.
Nalunaarusiami inerniliinerit aamma ilagaat Nunatsinni aningaasanoornerup ajornartorsiutaallunilu nuannarineqartupilussuunera.
Aamma atuaruk Innuttaasut peqqissusaat pillugu nalunaarusiaq saqqummerpoq
Pingaartumik tips lottolu, bingo, spilleautomatit aamma nallukattanik immeraatinillu assigiinngitsunik pinnguaatit ajornartorsiutitalimmik aningaasanoorutaasarput. Ilaallu aningaasanoornermut ueralutik pinngitsuuisinnaajunnaartarput, ludomanimik taaneqartartumik.
Ludomanili sukumiinerusumik misissuiffigineqartariaqarmat nalunaarusiamik allaatiginnittut inerniliiginnarput aningaasanoornermik ajornartorsiuteqarneq atugaasupilussuusoq, assersuutigalugu aningaasanoorneq pillugu sallusarneq aningaasallu amerlanerusut atorlugit aningaasanoortarneq angutit arnallu akornanni annertusisimammat.
Inuttaasut 18-ileereersimasut 7 procentii ajornartorsiutitalimmik aningaasanoortartuupput.
Ataatsimut isigalugu inuit tallimaagaangata ataaseq inuunermini arlaatigut ajornartorsiutitalimmik aningaasanooriaaseqarnermut ersiuteqarsimasarpoq.
Aamma atuaruk Ikiaroornartuerniat Inatsisartunit ikilisinniarneqarput
Matumani angutit aamma amerlanerussuteqarput, aningaasanoortartummi 25-t 34-llu akornanni ukiullit amerlanersaapput, ukioqatigiiaat allat akornanni arnat angutillu aningaasanoortartut amerlassusaat nikinganatik.
- Ajornartorsiutitalimmik aningaasanoornerup annertusisimaneranut suna patsisaasoq oqaatigissallugu ajornakusoorpoq, imaaratarsinnaavorli internettikkut aningaasanoornissap ajornannginnerulersimanera
patsisaaqataasinnaasoq, nalunaarusiami taama nassuiaasoqarpoq.
Atornerluinerullu atugaaneruleriartornerani mianersoqqussuteqarnissamut pissutissaqarpoq.
- Imigassamik hashimillu atornerluineq Kalaallit Nunaanni innuttaasut peqqissusaannut ajornartorsiutit ataasiakkaat annersaraat. Atornerluinerit taamaattut aningaasanoornermik ilaqarajuttuusarmata, pineqartut ataasiakkaat peqqinnerannuinnaanngitsoq minnerunngitsumilli inuiaqatigiinnut, avatangiisinut pingaartumillu meeqqanut ilaquttanullu atornerluinermik toqqaannartumik sunnerneqartunut kinguneri annertoqaat, nalunaarusiamik allaatiginnittut aamma allapput.
Aamma atuaruk Kalaallit atornerluisuusut ikorfartoqatigiiffeqalersut
Erseqqissaatigineqassaaq innuttaasut peqqissusaannik misissuititsineq 2014-imi ingerlanneqarsimammat.
