Haship Canadami ammaanneqarnissaa akuersissutigineqartoq
Canabissip inersimasunut ammaanneqarnissaanik inatsisissatut siunnersuut Canadap senatiani amerlanerussuteqartut akuersissutigaat.
Tamanna nunatsinni nalunaaqutaq malillugu sisamanngornermi unnukkut pivoq.
Inatsisip qaammatit marlussuit qaangiuppata atuutilernissaa naatsorsuutigineqarpoq, innuttaasullu 18-ileereersimasut cannabissimik inerteqqutaanngitsumik naatitsillutillu pujortarsinnaanngussapput. Tamanna aamma hashimut, naasumit hampimit suliarineqartartumut, marihuanamullu atuuppoq.
Canadamiut aamma cannabisimik 30 grammimik tigummiaqarsinnaatitaalissapput. Aammattaaq innuttaasoq ataaseq naasunik hampinik sisamanik naatitsisinnaassaaq. Naatitassalli tuniniaasartumit akuerisamit pisiarineqarsimanissaat piumasaqaataavoq.
AAMMA ATUARUK Pisiniarfiit cannabisimik nioqquteqarsinnaasut 80-it Ontariomi ammarneqalersut
Inatsit pinerluttuliornikkut cannabissimik iluanaarniuteqartunut pillaatissanik sakkortuunik aamma imaqarpoq. "Inuusuttunut cannabissimik tunniussineq tuniniaanerlu" ukiuni 14-ini parnaarussaanermik pillagaassutaasinnaavoq, canadamiut naalakkersuisuisa inatsit pillugu allaaserisaanni taama allaqqavoq.
Inatsilli inatsisartuni suliareqqinneqassaaq, cannabissilli ammaanneqarnissaa inatsisartuni novembarimi 2017-imi akuersissutigineqareerpoq. Senati siunnersuummut allannguuteqartitsimassappat, taakku inatsisartunit akuereqqaarneqartussaapput.
Senatillu akuersissuteqarneratigut Canadap nunani killerni canabissimik inersimasunut ammaassisuni siullersanngornissani qanilleqqippaa.
AAMMA ATUARUK Canadami Cannabis ammaanneqarniartoq
USA-mi naalagaaffiit ilaanni cannabis ukiuni kingullerni inerteqqutaajunnaarsinneqarpoq, tamannalu nunanut ataasiakkaanut aamma atuuppoq, soorlu assersuutigalugu Uruguayimut.
Aanngaajaarniutip inerteqqutaajunnaarsinnissaa Canadami maanna premierministeriusip Justin Trudeauip 2015-imi qineqqusaarnermini neriorsuutigaa.
Aamma taassuma siornatigut nassuerutigisimavaa ikinngutini peqatigalugit "tallimarianngikkuni arfinileriarluni" jointinik pujortarsimalluni.
Trudeauip naalakkersuisui liberaliusut ammaassinissaq pillugu inatsisissatut siunnersuut 2017-imi upernaakkut saqqummiuppaat.
Canadallu peqqissutsimut ministereqarfiata siunnersuummut atatillugu ilisimatitsissutigaa "inatsisiliorneq atuuttoq iluaqutaanngitsoq. Canadamimi inuusuttunut cannabissimik pisinissaq sikaratsisinermit ilaatigut ajornannginnerusarpoq. Taamaammat cannabis inerteqqutaajunnaarsikkusupparput".
Cannabis canadamiut akornanni atugaasupilussuuvoq. Canadamiut naalakkersuisuisa nittartagaat naapertorlugu, Canada aanngaajaarniummik atuiffiunerpaat ilagivaat.
2015-imi inuusuttut 21 procentiisa paasissutissiissutigaat ukiumi kingullermi canabissitorsimallutik, "inersimasunilu inuusunnerusuni" 30 procentit canabissitorsimapput.
/ritzau/AFP
