Hashi pillugu sioorasaarunni attatiinnarpaa
Polar Seafoodip kilisaataataa Polar Nanoq Islandimiitilluni ikiaroornartumik hashimik 20 kilomik nalaatsornerinnarmik nassaarfigineqarpoq.
Tamannalu aalisarnermut piniarnermullu naalakkersuisup sakkortuumik qisuariarfigaa, siunnersuutigalugulu kilisaammi ikiaroornartumik nassaartoqartillugu kilisaataatillit aalisarsinnaanermut akuersissummik arsaagaasinnaalissasut.
AAMMA ATUARUK Aalisarsinnaanermut akuersissutinik tunniussisarneq ikiaroornartumik nassaartoqarnera pissutaalluni sukateriffigineqalerpoq
- Suliffeqarfik taamatut nalaataqarusunngikkuni taava sukannersumik akisussaassuseqartumillu nakkutilleeqataasariaqarpoq, aalisarnermut piniarnermullu naalakkersuisoq Hans Enoksen oqarpoq.
Taama nalunaaruteqarneq Atassummit, Demokraatinit, KNAPK-mit Sulisitsisullu Peqatigiiffiannit isorineqaqaaq.
Sulisitsisup pisooqataasutut akuliunniarneqarnera pissusissamisuunngitsoq, Sulisitsisut Peqatigiiffianit oqaatigineqarpoq.
Inatsisinik unioqqutitsinaveersaarnissaq pisortat akisussaaffigigaat, Atassut allappoq oqaatigalugulu sulisitsisut sulisut inigisaannik misissuinissamut pisinnaatitaanngitsut.
Naalakkersuisulli isummani attatiinnarpaa.
- Soorunami inatsisit naalagaaffimmut naleqqussarneqassapput, unioqqutitsiniarluta inatsisiliorsinnaannginnatta malitassat malinneqartussaapput. Tassa qulakkiigassarput aamma.
Akitsuuserisulli aanngajaarniutinik eqqussinissamut pinaveersaartitsisussaasut, Atassutip erseqqissaatigaa.
Hans Enoksenillu nassuerutigaa Naalakkersuisut akitsuuserisunut aningaasalersuinerusariaqartut. Kilisaataatillilli akisussaaqataatinnissaannik isummernini aalajangiusimavaa.
- Tassa taanna assortorneqarsinnaanngiivippoq. Aningaasat amerlanerusut tassunga inissinneqartariaqarput aamma sumiiffinni amerlanerusuni misissuisarnerit aallartinneqartariaqarput, aalisarnermut piniarnermullu naalakkersuisoq Hans Enoksen oqarpoq.