Hardenberg kukkussuteqanngilaq
Ilisimaneqarpoq, Carsten Frank Hansen aningaasanik atornerluisimasutut pasisaammat aamma taassuma atorfittaavinit, allanit marlunnit soraarsitaasimasoq ilisimaneqarluni, tamatumalu kingorna Namminersorlutik Oqartussani aningaasaqarnermut tunngasunut qullersanngoraluarnera ilisimaneqarlunittaaq.
Carsten Frank Hansenip suliarisimasai pillugit, KNR.gl-ip ippassaq allaaserisaqareernerani, Svend Hardenberg oqaluttuarpoq Carsten Frank Hansenip suliarisimasaanik apersuisoqarsimasoq.
- Aningaaserivimmi Odense-miittumi immikkoortortaqarfiup pisortaatut nalunaarutit pissarsiagut aamma suliffeqarfimmit Greentop Greenland-imit pissarsiagut aallaavigalugit, sunik ajortoqarneranik takusaqanngilagut, Svend Hardenberg KNR.gl-imut ippassaq oqaluttuarpoq.
Greentop Greenlandip paasissutissanik nassiussaat atorfinitsitsinermi isiginiarneqarsimanngitsut, Radioaviisimi ippassaq unnukkut oqaluttuaraarput. Aamma oqaluttuaralutigu Svend Hardenbergip pisumut oqaatigisimasai eqqunngitsuusut.
Taama oqaluttuarnerput Svend Hardenbergimut Radioaviisimit oqaatigaarput. Kisianni tassa Svend Harden maanna oqarpoq, Greentop Greenlandimit paasissutissanik, atorfinitsitsinermut ataatsimiisitaliaq pissarsiniarsimasoq, Radioaviisimut oqaatigisimanagu.
Svend Hardenbergimit taama Radioaviisimit tusagaqarnerput tusaatissatut tiguarput, taamaattoq Svend Hardenbergip oqaatigeqqaagai, inuiaqatigiinnut oqaluttuarinissaat pingaaruteqarluinnartutut isigalutigit oqaluttuarineqarsiamneri attallugu, tassami paasissutissat taamaattut inuiaqatigiinnut pingaaruteqarluinnarmata.
