Hans-Peder Barlach Christensen aqutsisoqarfittaami pisortanngussaaq
Nunatsinni isumaginninnermut aqutsisoqarfimmik pilersitsinissaq 2017-imut aningaasanut inatsimmi akuersissutigineqarpoq. Aqutsisoqarfimmilu tassani Hans Peder Barlach Christensen pisortanngortussanngorpoq. Naalakkersuisut tusagassiorfinnut nalunaaruteqarlutik taama allapput.
Pisortanngortussarlu isumaginninnermut, ilaqutariinnut, naligiisitaanermut inatsisinillu atortitsinermut naalakkersuisup nuannaarutigaa.
- Isumaginninnermut Aqutsisoqarfiup kommuninik qanoq ikiuillunilu ikorfartuinissaa pillugu aallussisoqassammat, nuannaarutigaara Hans-Peder Barlach Christensen sulilersinnaqassammat, kommuninut suliassani pineqartuni piffissami sivisuumi sulianik ingerlatsilluni suliassaqarfinnillu aallussisimammat, naalakkersuisoq Sara Olsvig taama oqarpoq.
Naalakkersuisut naapertorlugit 'qitiusumit kommuninik pitsaaneroqisumik ikorfartuinissaq siunertaralugu aqutsisoqarfik pilersinneqarpoq'.
Hans-Peder Barlach Christensen sulinermik inuussutissarsiutillit kattuffianni SIK-mi pisortatut ullumikkut atorfeqarpoq. Aamma ilaatigut kommunit kattuffianni KANUKOKA-mi siornatigut pisortaasimavoq.