Hans Egedep illua iluarsartuunneqarpoq

Europamiusut illu nunatsinni sananeqaqqaartoq, Nuummiittoq Hans Egedep illorsua aserfallatsaaliorneqaleruttorpoq. Naak qalipanneqaannaraluartoq suliaq angeqaaq.

Illorsuaq sungaartoq Nuup saavani Hans Egedep John Møllerillu aqqutaasa akornanni inissisimavoq. Taanna ukioq naallugu inuaqillunilu kiassarneqarpoq, angerlarsimaffittulli atorneqanngilaq. Illorsuaq taanna tassaavoq Hans Egedep illorsua nunattalu oqaluttuarisaaneranut pingaaruteqarluinnartoq:

- Taanna nunatsinni siullersaalluni 1728-mi sananeqarpoq. Hans Egedep maanga ilorparterami illu sanasimavaa ilaqutariinnut sulisuinullu inissiassatut, oqaluffiusussatullu, Nunatta Katersugaasivianiit illutoqqanik iluarsaanermi pilersaarusiortoq Inge Bisgaard oqarpoq.

AAMMA ATUARUK Ilimanami illutoqqat marluk nutarterlugit naammassineqartut

Inatsisartut Hans Egedep illua ilaatigut ataatsimiinnissartik sioqqullugu naapittarfittut atortarpaat. Illu eqqissisimatitaavoq illutoqqallu taama ittut nalinginnaasumik ukiunik tallimaniit arfineq marlunnut akuttussusilimmik iluarsartuunneqartarput.

Inuiattut ineriartornitta oqaluttuassartaa kinguaatsinnut tunniuteqqissagutsigit, takussutissartai aserfallatsaaliortariaqarigut, Inge Bisgaard oqarpoq:

- Pingaaruteqarluinnarpoq. Inuiattut ineriartornitsinni oqaluttuassartaa tassaniikkami, tassa ineriartornitsinni aqqusaakkagut. Suunukua siuaasatta illugisimagaat suliffigalugillu.

AAMMA ATUARUK Ittoqqortoormiini oqaluffik ueriartortoq

Qangatut isikkoqassaguni, qanga qalipaariaatsit atorlugit qalipanneqassaaq; Siullermik kalkiterneqassaaq naggataatigullu uuliaterneqassalluni.

- Allaanerussuteqarpoq. Peqqissaarunnarneruvoq iluasaarunnarnerullunilu, taavalu allaninngaanniit kigaannerusumik suliassaalluni, illumik qalipaasoq, Johan Olsvig, oqarpoq.

Hans Egedep illua ukiuni 290-ini napavoq, qaqugumorsuarlu napaqqullugu iluarsaakkitsik, Inge Bisgaard oqarpoq:

- Nunatsinni illutoqqat amerlasuut ullutsinni aserfallannikorujussuit annaalerpagut taamaammallu takusassartai ikiliartorput. Kinguaatsinnullu pingaaruteqaraluaqaat.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!