VIDEO Hammondip qinigassanngortissinnaaneranut akuersisut akerliusullu

Naalakkersuisunut siulittaasuusimasup Aleqa Hammondip Siumup qinigassanngortitaanut akooratarsinnaanera aviisip AG-p pingasunngormat allaaserisaa.

Siumup siulersuisuunerini ilaasortap John Olsenip Aleqa Hammond qinigassanngortitassatut innersuussimavaa, namminiilivinnissamut ikaarsaariarnissap sulissutiginissaanut piukkullugu.

- Taamaammat Siumup siulersuisuunerini ilaasortatut Aleqa Hammond qinigassanngortitassatut innersuuppara, KNR-imut taama oqarpoq.

Siumut isigisoqartariaqarpoq

Aleqa Hammond nunatta karsiata aningaasaataanik atuilluni 106.363,27 koruuninik akiligassaqalersimanermi kingorna Naalakkersuisut siulittaasuattut siorna oktobarip aallaqqaataani tunuarpoq. John Olsenilu isumaqarpoq tamanna uninngaffigiinnarneqartariaqanngitsoq.

- Kingumut isigiinnarluta inuuinnarsinnaanngilagut, taama oqarpoq.

Aamma atuaruk Siumup ilumoornerarpaa: Aleqa Hammond Folketingimut qinigassanngortikkusutanut ilaavoq

Akerliusut akuersaartullu

Aleqa Hammondip oqaaseqartinnissaa iluatsissinnaasimanngilarput, Nuummili innuttaasut akornanni akuersaartoqarlunilu akerliusoqarpoq.

- Qinigassanngortinnissaa ilumoorsinnaanngilaq. Qinigassanngortissappat tupaallannassaqaaq.

- Soorunami pisinnaatitaaffigivaa, isumaqarpungali killeqartariaqartoq, Birgithe Egede Larsen taama oqarpoq.

Mina Poulsenili isumaqarpoq naammattumik pillarneqareersoq.

- Iliuuserisimasaanut pillartuarsinnaanngilarput.

- Kinaluunniit inuttut ineriartortarpoq, piginnaasai isiginiarnerusariaqarput.

Inatsisartuni politikerit akornanni Aleqa Hammond taperserneqarpoq. Tamanna nammineq aalajangigassaraa, Partii Naleqqameersoq Per Rosing-Petersen isumaqarpoq, parteeqataatalu Hans Enoksenip oqaatigaa innuttaasut kina qinerusunnerlugu nammineq aalajangigassarigaat.

Aleqa Hammond pillugu allaaserisat allat uani atuarneqarsinnaapput.