Halibut Greenlandip Aalisarnermut Naalakkersuisup tikeraarnera ajorinngilaa
Naalakkersuisut aningaasarsiornikkut siuarsaanissat eqqarsaatigalugu, tamanna Halibut Greenlandimut isumalluarnarpoq, taama oqarpoq aalisakkanik tunisassiorfiup pisortaa, Niels Thomsen, Aalisarnermut Piniarnermut Nunalerinermullu Naalakkersuisup avannaani qaleralinnik tunisassiorfiit paasisassarsiorfigereeraalu.
- Naalakkersuinikkut siunertat pissaganartutut isigaagut. Tassami qitiutinneqarami aningaasarsiornikkut Nunatsinni siuarsaasoqarnissaa, Halibut Greenlandip pisortaa, Niels Thomsen taama oqarpoq.
Naalakkersuisooqatigiit isumaqatigiissutaasa siunertaanik nassuiaassinissaq, Aalisarnermut, Piniarnermut Nunalerinermullu Naalakkersuisup, Karl-Kristian Krusep avannaani tikeraarnermini pingaartinnerpaartaaraa, taamaalilluni qaleralinniartarneq aammalumi aalisakkanik allanik atorluaanerunissaq pillugu oqaloqatigiinnerunissaq anguniarneqarluni, tamannalu neriunaateqartoq, Niels Thomsen oqarpoq.
- Aalisakkat qaleruallillu eqqarsaatigalugit taakku atorluarneqarnerunissaat Naalakkersuisunit aamma sulissutigneqartussaasoq paasinarpoq, tamanna Halibut Greenlandimi anguniakkatsinnut tulluuteqqinnaartutut isigaarput. Taamaattumik tigussaasunik Naalakkersuisut qanoq iliuusissaat maanna utaqqiinnarpagut. Neriuutigaarpullu tamanna pilertortumik suliniutigineqarlutik piviusunngortinneqarsinnaasut, Halibut Greenlandip pisortaa, Niels Thomsen oqarpoq.
Uummannami Royal Greenland aamma tikeraarneqarpoq. Tassanilu aalisakkeriviup pisortaata, Kirsten Jensenip, Naalakkersuisup tikeraarnera isumallualesitsinerarlugu, KNR-imut oqarpoq.
- Tamanna Uummannami Royal Greenlandimut siunissami pittaaquteqassaaq tassami pisariaqarpoq, Naalakkersuisunit suleqateqarluni aalisarneq pitsaasumik ingerlaneqarnissaa. Tamanna pissaaq aalisartut Naalakkersuisullu suleqatigiinnerisigut, Kirsten Jensen oqarpoq.
Aqutsiveqarfiit Qeqertarsuup Tunuaniittut, Uummannamiittut taamatullu Upernavimmiittut killeqarfii, Naalakkersuisunit siorna septembarip 15-anni allanngortinneqarput. Tamannalu Uummannami aalisartunut aalisakkerivimmullu aallaqqaammut ippinneqartoqarsimasoq, Kirsten Jensenip oqaatigaa.
- Tamassuma atuutsinneqalernera Uummannami Royal Greenlandimut aallaqqaammut sakkortulaarsimavoq, tassami angallatinut anginernut tamanna killuup tungaanut sunniuteqaleraluarluni tassami pisassiissutit ingerlaannaq nungunneqarnerisigut angallatit angisuut pisassaarukkaluaramik, tamannali maanna aaqqittutut oqaartigineqarsinnaavoq.
Uummannami Royal Greenlandip aalisakkeriviani pisortaq, Kirsten Jensen oqarpoq.
Taassuma ilanngullugu oqaatigaa, qaleralinniarnermi killeqarfiit allanngortinneqarnerisa kinguneranik umiatsiaararsorlutik qaleralinniat ukiakkut sivisunermik aalisarsinnaalernerat periarfissinneqarmat.
