Halibut Greenlandip ukioq manna avaleraasartoorniarneq peqataaffigissanngilaa
Ukiut siuliini pisartut assiginagit, Halibut Greenland qinnuteqartunut ilaanngilaq. Tamanna ingerlatseqatigiiffiup tusagassiuutinut marlunngornermi nalunaarutaani atuarneqarsinnaavoq.
Ingerlatseqatigiiffimmi pisortap Niels Thomsenip takusinnaanerarpaa, aalisarnikkut inuussutissarsiuteqartut sinaakkutinik pitsaasunik pilersitsinissamut politikerit pisinnaassusaat piumassusaallu piunngitsoq.
Avaleraasartuunut akitsuutsip qaffasinnera maannamut akilersinnaasumik ingerlatsisinnaaneq ajornakusoortikkaa, Niels Thomsenip tikkuarpaa, nunat allamiullu pisassinneqarsimasunik suleqateqarlutik nunatsinnukkarusussuseqannginnerat apeqquserpaa.
Akitsuut pissutigalugu aningaasarsiorniarneq ajornakusoorpoq sulilu ajornakusoornerulerpoq kilomut akitsuut 0,95 koruuninit 1,50 koruuninut qaffanneqarmat, Niels Thomsen allappoq.
Pisortap oqarnera naapertorlugu, politikerinit pingaarnerpaatinneqaannavippasippoq Nunatta Karsiata aningaasanik immerneqarnissaa - oqaartoqarsinnaalluni aningaasat pineqartut takorluukkersaarutaannaasut, Niels Thomsen tusagassiuutinut nalunaaruteqarluni taama allappoq.
Halibut Greenlandip suliffeqarfiutaa Halibut Greenland Pelagic ApS nuna allamiut angallataat atorlugu ukiuni kingullerni marlunni avaleraasartoorniarsimavoq.
