Aaqqissuisuuneq: Hagenip Sermitsiaq nutaanngorsarpaa
Hagen Højer Christensen, piartortut uninngavianni Diakonissestiftelsens hospicemi oktobarip aallartisimalaarneranili uninngavoq.
Hagen Højer Christensen, Sermitsiami 1982-imit 1990-imi januaarip aallaqqaataata tungaanut aaqqissuisuuvoq, Hagenillu aviisimut sunniuteqangaatsiarsimanera qularutissaanngitsoq, Sermitsiap maanna aaqqissuisuunerata Poul Krarupip, Hagen Højer Christensenip aaqqissuisuujunnaarnerata kingorna aaqqissuisunngortup, oqaatigaa:
- Sermitsiaq nutaanngorsarpaa, nuna tamakkerlugu saqqummersartunngortillugu. Sermitsiaq, Nuummiinnaq taamanikkut saqqummersinneqartarpoq. Taanna kalaallinit, naalagaaffiup tusagassiorfiini oqarsinnaannginnerminnut akerlilersuisunit pilersineqarpoq. Hagen sioqqullugu aaqqissuisuusut aviisi nuna tamakkerlugu saqqummersartunngortinniarlugu sulipput. Kisianni Hagenip Sermitsiap nuna tamakkerlugu saqummersartuunera Namminersornerullutik Oqartussanut akuersaartariaqalersippaa, taamaalillunilu pisortat nivinngagaat tamaasa pissarsiarai, Poul Krarup oqarpoq.
AAMMA ATUARUK AG og Sermitsiaq vil alligevel ikke samarbejde
Hagen Højer Christensen Sermitsiameereerluni Kalaallit Nunaanni Sulitsisut Peqatigiiffianni 1994-ip tungaanut pisortaavoq, tamatumalu kingorna Kujataata Naqiteriviani pisortaalluni.
Nipi ilisarnartoq
Hagen Højer Christensenip nunatsinni tusagassiorfinni sulinini Avannata aviisitoqaani Avangnamiok-mi sulilluni aallartippaa.
Taava radioaviisimi 1974-imi siullermik atorfinippoq. 2009-mi KNR-imeeqqilerpoq. Inuppassuarnullu nipaa ullaakkut tusaqqaagassaasarpoq. Hagenip soraarninngornissaminut KNR-imiippoq, radioaviisimillu kingullerpaamik maajip 29-ani 2015-imi atuaalluni.
Hagen Højer Christensen 71-inik ukioqalerpoq.