Assammik arsarlutik Nunatsinniit unammisartut Mexicolu naligiiginnartut
Kalaallit arnartaat Mexicomut unammipput, unamminerlu ajornakusoorsimaqaluni. Kalaallit Nunaat unamminermi ilungersoraluarlutik målinik marlunnik pingasunik kinguaqqaannaavilluni.
Taamaattoq unammineq naammassimmat Kalaallit Nunaat Mexicolu naligiipput, tamarmik målinik 20-nik isertitsigamik.
Mexico unammissallugu ajornakusoorsimaqisoq, nunanut allanut unammisartut sungiusaasuata ikiortaata Johannes Grothip tusagassiuutinut nalunaarummi oqaatigaa, Mexicomiut arsartartui sukkanerarlugit, illersuillaqqinnerarlugillu:
- Taamaammat unamminerup naammassinngitsiarnerani 50 sekundit sinneruttut naligiilersinnagatta tulluusimaarutigaarput, Johannes Groth oqarpoq.
Mia Egede kalaallit arsartartuini isertitsinerpaavoq arfinilinnik isertitaqarami.
Kalaallit Puerto Ricomi unammeqqaarmata USA-mut 26-26-mik aamma naligiipput. Kalaallit arnartaat taamaalillutik suli ajugaaffigineqanngillat.
Kalaallit Nunaat amerikap nunavittaani assammik arsarluni unammersuarnerni tulliani ullumi pingasunngornermi unammissaaq, tamatumuuna unammersuarnernik aaqqissuisut Puerto Rico unammissallugit.