ASSIT GUX Aasiaat nutarterpoq
Tassami GUX Aasiaat nutarterneqarnera naammassivoq, ilinniarfillu nutaaq ilinniartut ilinniartitsisullu februaarip ulluisa 22-anni iserterfigisinnaassavaat. Ilinniarnertuunngorniarfiummi pisoqaanersartaa nutarterneqaqqammerpoq, illutaalu nutaamik aamma ilaneqarsimalluni.
Sanasut ukiuni marlunni sulereerput, GUX Aasiaallu nutaamik aallarteqqissinnaagusssaaq.
GUX Aasianni rektorip Otto Simonsenip tallimanngorneq februaarip 22-at ulloq nalliuttorsiorfittut taavaa, tassani oqalugiartoqarlunilu, erinarsoqatigiittoqarlunilu nereqatigiittoqassagami, GUX Aasiaallu nutarteqarnera pillugu aamma takornarniartinneqassalluni.
Ilinniartitaanermut Naalakkersuisoq Nivi Olsen qaaqqusanut ilaavoq. Taanna Avannaani Ilinniarnertuunngorniarfimmi nammineq 2001-imit 2004-mut ilinniartuuvoq.
- Ilinniarnertuunngorniarfittaap ilinniagaqarusuttunik maanna ilinniartuuteqalernissaa tullinnguuppoq. Kalaallit Nunaanni ilinniarnertuunngorniarfiit akornanni pitsaanerpaatut inissisimalernissarput suliniutigissavarput, rektori Otto Simonsen oqarpoq, nangillunilu:
- Immap naqqatigut kabeli aqqutigalugu internetikkut attaveqaammik pitsaanerusumik peqalernissarput amigaatigiinnarparput, ilinniarfitta pissutsinut maanna 2016-imut atuuttunut naleqquttunngortinneqarnissaa tulliulluni, Otto Simonsen oqarpoq.