GSS-ip pissartanngoqqinnissaa ilimanartoq
GSS-ip arnartai angutitaalu ukiorpaalunngortuni unammilligassaarpiarnikuunngillat. Taakkumi ukiut arfineq marluk tulleriit pissartaasarput. Ukiormannalu pissartaanertik illersorlugu kuultinnaqqinnissaat ilimanarluinnarpoq.
Angutini Nagdlunguak Ilulissaneersoq GSS-imut unammillersinnaasut ikittut ilagaat. Pappialatigummi pikkorissuusut GSS-imi sungiusaasoq Johannes Groth KNR-imut oqarpoq.
- Pissartanngoqqinnissarput ilimagineqartoq nalunngilarput. Taamaattoq N-48-mi unammisartut malinnaaffiginikuuagut nalunngilarpullu pikkorissorujussuarnik unammisartoqartut. Taamaammat unamminissaat pissanganassaaq, Groth oqarpoq, oqaatigalugulu Norsaq HC Aasianneersoq, ukiuni kingullerni tupaallatsitsisartoq, tupaallatsitseqqeriaannaasoq.
GSS-ip arnartai ukiuni arfineq marlunni pisassaanikuunngillat. Ukioq kingulleq kuultinnanniuunnermi NÛK-mut målinik 15-inik ajugaanikuupput, ukiormannalu taamaalioqqinnissartik siunertarigaat sungiusaasuat Kim O. Petersen KNR-imut oqarpoq.
- Ukioq naallugu sungiusarnikuuvugut apeqqutaaginnarporlu tamanna qanoq timitalersinnaaneripput, Kim O. Petersen oqarpoq.
GSS-ip arnartai Nunatsinni unammisartunut allanut sanillersuussinnaavallanngillat pikkorissutsimikkummi qaffasissorujussuugamik. Taamaakkaluartoq ukiut tamaasa pitsaanerusumik angusaqarniartarput.
- Ukiut tamaasa pitsanngoriarnissarput siunertarisarparput, Kim O. Petersen oqarpoq.
Ukioq manna maluginiagassat ilagaat arnani Team Nuup peqataanera. Team Nuuk inuusuttuaqqanik NÛK-mi GSS-imilu sungiusartartunik unammisartoqarluni peqataassaaq. Unammisartui holdiminni peqataanikuunngillat taamaammallu Team Nuummi peqataasinnaallutik. Pissartanngorniuunnerni qanoq angusaqassanersut pissanganassaaq.
Holdit peqataasut ukuupput:
Arnani:
NÛK
SAK
Team Nuuk
Norsaq HC
GSS
N-48
Angutini:
NÛK
SAK
Nagtoralik
Norsaq HC
GSS
N-48
Pissartanngorniuunnerit KNR-TV-mi aallakaatinneqassapput. TV-kkut aallakaatinneqartussat uani takukkit.
