Greenpeacermiut Shellip sikunik aserorterutaanik assersuisut
Sikunik aserorterut iluarsaanneqareerluni Shellip Alaskap avataani uuliasiorluni qillerinerani ikiuiartortussaq unitsinniarsaraat.
Shell qillerinissamut Amerikami oqartussaasunit sapaatit-akunnerata siuliani akuerineqarpoq, sikunik aserorterut sapaatit-akunnerata siuliani Alaskamut apuutiinnarluni ajutoortoq, qillerivimmut apuunniariarpat Shellip akuerineqarnissamik qinnuteqaateqaqqinnissaa piumasaqaatigineqarluni.
AAMMA ATUARUK Shellip issittumi uuliasiorluni qilleriniarnera Obamamit akuersissutigineqartoq
Sikunik aserorterut Fennica iluarsaanneqareerluni Portlandimi umiarsualivimmit unnuaq aallariaraluarpoq, maannali tassa Greenpeacemeersunit 26-nit ikaartarfissuarmit St. Johns Bidgemit meterinik 124-nik portussuseqartumit imminut ningissimasunit assersorneqarluni.
Demokraatit præsidentissatut sassartitaata Hillary Clintonip Issittumi uuliasiorluni qilleriniarnerit annertuumik qularnartillugit ippassaq nalunaaruteqarnerata kingorna Greenpeacemeersut taamaaliorput. Taamatullu nalunaaruteqarnera Issittup imartaani sunnertiasumi uuliasiorluni qillerinissamut inaarutaasumik præsident Obamap akuersissuteqannginnissaanut kimigiiserfigeqqinneqarneratut isigineqarsinnaasoq, Greenpeace taama isumaqarpoq.
