Greenpeacep akornusersuinera politikerit ilaasa kamaatigaat
Greenpeacep Cairn Energymik akornusersuinera eqqarsaatigalugu, Naaja Nathanielsen Inuit Ataqatigiinneersoq isumaqarpoq Greenpeacermiut qanoq iliuuserisaannut isiginnaartuuinnarani oqaloqatigineqarsinnaasariaqartut.
- Imartatsinni qillerititsinermi Greenopeacep akerliunerminut tunngavilersuutai tusaaniartariaqarigut nammineerlunga isumaqarpunga, aammali taassuma saniatigut soorlu DMUp tunngavilersuutai isummerfigissagigut isumaqarlunga, Naaja Nathanielsen oqarpoq.
Cairn Energyp qillerinermini kemikaalianik aappaluttunik taaneqartartunik, Ultrahibinik aappaagummiit maangaannaq maqiteqqusaajunnaarnissaannut, Naaja Nathanielsen Inuit Ataqatigeeqataalu qilanaarput.
Kattusseqatigiit Partiiata Inatsisartunut ilaasortaatitaa, Knud Fleischer isumaqarpoq, Cairn Energyp kemikaalianik aappaluttunik maagaannaq eqqaannginnarani qanoq ilioriusissamik nassaartoqartariaqartoq, oqarlunilu avatangiisitta mianerineqarnissaa pingaartinnerusariaqaripput.
- Tamatta avatangiiserput illersortussaavarput, taamaattumik isumaqarpugut Naalakkersuisuninngaanniit oqariartorfigineqartariaqarpugut qanoq annertutigisumik imartarput mingutsinneqassanersoq, Knud Fleischer oqarpoq.
Greenpeacep nunatta imartaani iliuuseqarnera Naalakkersuisunit akuleruffigineqassanngitsoq, Inuit Ataaqatigiinnit Naaja Nathanielsen oqarpoq, tamannalu Andreas Uldumip Demokraatineersup tapersinngilaa.
- Umiarsuit pinerlunnermut atugaat arssarinnissutigineqartariaqartut uanga nammineerlunga isumaqarpunga, Andrea Uldum taama oqarpoq.
Qillerinerup nalaani immami mingutitsisoqassappat tamanna qanoq iliuuserineqartariaqarpoq qanorluunniit tamanna qanoq akisutigigaluarpat, Siumup Inatsisartuni ilaasortaatitaa, Karl Lyberth oqarpoq:
- Nunarput avatangiisigullu illersorniarutsigit akisugisaqarata illersuisariaqarpugut, Karl Lyberth isumaqarpoq.
Greenpeacekkormiut qillerivimmik Leiv Eirikssonimit tiguaanerannit maanna 80 timit qaangiussimalerput, taamaaliornerallu Naalakkersuisunit suli politiinut suliakkiutiginngilaat.
Atassutip Inatsisartunut ilaasortaatitaata, Knud Kristiansenip nalornissutigaa qaqugu Naalakkersuisut politiinut suliassanngortitsissariaqarnersut, taanna ima oqarpoq:
- Maannakkorpiaq politiinut suliassanngortitsisoqarnissaa kissaatigissanerlugu nalugallarparput, kisianni inuup inuuneranik nalilimmik ulorianartorsiortitsisoqalissappat politiinut suliassanngortitsinissaq soorunami kissaatigissavarput, Knud Kristiansen oqarpoq.
