Greenpeacekkut nuannarineqarusuttut
Greenpeacekkut puisinniartarneq pillugu Nunatsinni 80-ikkunni suliniutigisimasatik tusaamanerlugaassutigilersimasatillu allanngortikkusuppaat.
Siunertaalli taannaannaanngilaq. Tassami uumasut miluumasut aamma sorsuutiginiarpaat.
- Tunup avannaani sajuppillatsitsilluni misissuinissat naalakkersuisunit akuerineqarnerat Kalaallit Nunaannukarnitsinnut peqqutaavoq. Isumaqaratta immami miluumasunut akornusiisinnaanera sakkortusinnaasoq, mianersornartuusorlu, Greenpeacemi issittumut tunngasuni akisussaasoq Jon Burgwald oqarpoq.
TGS NOPEC Norgemeersut sajuppillatsitsillutik Tunup avannaata imartaani uuliaqarnersoq misissueqqissaarput.
Taamaaliornerup qilalukkanik arfivinnillu navianartorsiortitsisinnaanera Greenpeacekkut aarlerissutigaat.
AAMMA ATUARUK Greenpeace russit piumasaaqaat pillugu: Silaaruttutut salliuniarnermut alloriarnerussaaq
80-ikkut uggoraat
Greenpeacelli Nunatsinnukarniarneranut tamanna kisimi peqqutaanngilaq. Puisinniartarneq pillugu nunarsuup ilaani 80-ikkunni akerliorujussuarnermi Greenpeacekkut peqataanikuupput.
Tamaammat Nunatsinni tusaamanerlugaalerput qinngarsugaalerlutillu. Nunatsinnukarniarnerminnilu aamma nuannerineqarnerulernissamik siunertaqarput.
- Greenpeacep Kalaallit Nunaanni oqaluttuassartaa nuannernerpaanngilaq. Kisianni ullumikkut qanoq aaqqissuussaanerput taavalu Greenpeace maannakkut qanoq ittuunerata aammalu Greenpeacep 80-ikkunni qanoq ittuunerata assigiinngissutaat oqaluttuariumallugu aammali innuttaasut namminneq uatsinnut isummersuutiminnik saqqummiussinissamik periarfissikkusuppavut, Jon Burgwald oqarpoq.
Greenpeacep Nunatsinni tusaamanerlugaanini ukiorpassuanngortuni allanngortinniarsimavaa. Tusaamanerlugaanerami Nunatsinni sulineranut ajoqutaavoq.
- 80-ikkunni iliuuserinikuusavut peqqutaallutik nunanut allanut naleqqiullugu Kalaallit Nunaanni suliniuteqarnerput ajornarneruvoq. Tamannali uniinnassutiginianngilarput, oqallissutigitikkusutarput pingaartuusoq nalunnginnatsigu. Kalaallillu oqalliseqatigerusuppavut, Greenpeacemi issittumut tunngasuni akisussaasoq Jon Burgwald naggasiivoq.
