Greenland Oil Spill Response A/S aallartilluarpoq

Ingerlatseqatigiiffik aallartilluarpoq, ingerlatseqatigiiffiullu uuliasiortut aamma pisortatut oqartussaasut qanimut oqaloqatigalugit aallartilluni, Namminersorlutik Oqartussani Attaveqaqatigiinnermut pisortaq Sofia Geisler taama allappoq.

Ingerlatseqatigiiffiup ingerlanneqarneranut tunngaviusoq tassaavoq, uuliakoortoqaratarnissaanik pinngitsuuititsiniarluni atortussanik Nunatsinni uuliasiortunut akiliisitsilluni atugassiisarneq. Ingerlatseqatigiiffiit uuliasiortut, aatsitassanut inatsit malillugu akuersissummik pigisaqartut, Nunatsinni suliaqarnissamut akuerisaasumik uuliamik mingutsitsisoqarsinnaaneranut upalungaarsimassapput.

Ingerlatseqatigiiffiit uuliasiortut upalungaarsimanissamut pilersaarumminni Greenland Oil Spill Response A/S’p atortuinik atuinissamut pisussaaffeqarput, tassa atortut teknikkikkut ajoquteqartut imaluunniit akilersinnaasumik unammillersinnaassuseqannginnerat uppernarsarsinnaanngikkunikku. Tamatuma saniatigut suliffeqarfiit allat imaani uuliakoortoqaratarsinnaaneranut upalungaarsimallutik aamma aallartipput, ingerlatseqatigiiffiullu naatsorsuutigaa taamatut suliaqartarneq annertusiartussasoq.

Piffissaq ungasinnerusoq isigalugu takorloorneqarpoq, ingerlatseqatigiiffik nunani tamalaani maleruaqqusat pitsaanerpaatut akuerisaasut naapertorlugit 60°N-ip avannaatungaani tamarmiusumi sullissinertigut atortutigullu tunniussisinnaasunngorlugu uuliakoortoqaratarsinnaanermut upalungaarsimaffittut tamakkiisumik ineriartortinneqassaaq.

Naalakkersuisut Siulittaasuat Aleqa Hammond oqarpoq:

- Nunatsinni uuliakoortoqaratarsinnaaneranut upalungaarsimaffiup uuliamik mingutsitsisoqartillugu pilertortumik naammassisaqarfiusumillu suliaqarnissamut qulakkeerinnittup maanna atuutilernera nuannersuuvoq. Ingerlatseqatigiiffiup ineriartortinneqarneranut malinnaanissannut qilanaarpunga.

Ingerlatseqatigiiffiup siulersuisuisa makku inuttarai Steen O. Hansen, Oddbjørg V. Greiner aamma Hanne Berthels.