Greenland Expressip angalanissat maangaannartippai
Timmisartortitsiveqatigiiffimmiillu aningaasartuutigisimasai suli utertinneqanngillat.
Legolandimukarnissaraluaq angaavatalu 50-liinissaanut ornigunnissaq tassaapput piviusunngunngitsoortut.
- Angalasussaagaluarpugut, Greenland Expressip angalanissaa uninngitsuuppat Danmarkiliartussaagaluarpugut Billundiliarluta, Uiloq Kleist Nielsen Qaqortumeersoq taama oqarpoq, taassuma ernermi sinnattua Danmarkimut arninilu aasarsioriarnissartik kissaatigisimagaluarpaa.
Aamma atuaruk Greenland Expressip taamaatitsineri Atuisartut siunnersuisoqatigiivini ulapaartitsisut
Gert Braskip timmisartortitseqatigiiffik aallartitaanut aasaq manna angalanissamut taanna upperinnittunut ilaavoq. Erneratalu qulingiluanik ukiullip kissaataa, legolandimut angalanissaq maangaannarpoq.
- Apriilimi aalajangerpugut Danmarkiliarniarluta, ernera legolandiliarusuttarmat aalajangerpugut aallarniarluta. Kisianni eqqugaasunut ilaavugut, ernermalu sinnattua piviusunngunngitsoorpoq.
Taannaannaanngilarli, timmisartortitseqatigiiffimmut akiliutigisimasatik suli utertinneqanngillat.
Aamma atuaruk Greenland Express kinguartitseqqittoq
- Sapaatip akunneri marluk maannakkut ingerlapput angalanissat uninnerat pillugit allagarsigattali. Ingerlaannarlu allagarsilluta aningaasat utertinneqarnissaannut uppernarsaat kisianni maannakkut sapaatit akunneri marluk ingerlapput, suli aningaasat 9000 missaanniittut utertinneqaratik.
Uiloq Kleist Nielsenip Greenland Express oqarasuaatikkut attaviginiartaraluarpaa, attaveqartullu una tusaasarpaat:
- Greenland Expressimut sianerputit, Danmarkimiit Kalaallit Nunaannullu Greenland Expressip aggustip 17-niata tungaanut angalanissai tamarmik unipput.
Aamma atuaruk VIDEO Greenland Expressip aasaanerani timmisartuusseqqaarnissani kinguartippaa
Taamaattumik attavissatigut allagaqaraluarami iluatsitsinngilaq.
Uiloq Kleist Nielsenip periarfissat allat ujartoraluarpai akisuallaalersimammata erneranut anaanaanullu angalanissat unitsiinnarpaat. Uilorlu oqaluttuarpoq ernera Ivik legolandiliarnissaminut aningaasanik katersisimagaluartoq. Angalanissaallu uniinnarmat katersani tamaasa legonut atorpai.
Tamannalu saammarsaataalaaginnarpoq.
- Uannut, ernernut tunniukkusutaraluarigaluara pakatsinermut pigami, taanna annernarpoq. Tunniussinnaajunnaarlugu maanna piffissami sinnattua piviusunngortissinnaanagu, Uiloq Kleist Nielsen oqarpoq.
Aamma atuaruk Greenland Express tjekkiamiut timmisartuliaannik atuiniartoq
KNR-miit Gert Brask unitsitsiinnarnerit pillugit oqaaseqartinniarsimagaluarparput, iluatsitsiffiunngitsumik. Imalu kisimi oqaaseqarusuppoq: Greenland Express Holdingimut piginneqatigiissutip ilaa suliffeqarfimmut Wurban Groupimut atilimmut tunisimallugu.
- Greenland Express Holdingip pigineqarnerata ilaa ippassaq tunineqarpoq, taamaattumik tusagassiorfinnut oqaaseqarsinnaatitaajunnaarpunga siulersuisut aqutsisullu nutaat inissitsinnagit, taanna allappoq.
Taamaattumik maannamut timmisartortitseqatigiiffik qanoq ingerlanissaa suli nalunarpoq, aamma timmisartuussissanersoq suli ilisimaneqanngilaq.
Aamma atuaruk Atorfillit pissaaneqarpallaarmata Greenland Express uninngatinneqarpoq