Greenland Expressimit aningaasatitik suli tigoqqinngilaat
Ingerlativiullu pisortaa oqaaseqaqqusaanngitsoq piginneqataasut oqaatigaat.
Gert Brask, septembarip aallaqqaataani Qanoruumiit apersorneqarnermini neriorsuigaluarpoq septembarip qulingiluaata kingorna oqaaseqassalluni.
Gert Braskili KNR-imit allakkatsigut saaffigineqarmat, Islandimi suliffeqarfik, Greenland Express Iceland EHF, taanna sinnerlugu akivoq.
- Gert Brask tusagassiuutinut oqaaseqaqqusaanngikkallarpoq, suliffeqarfik akissummi allappoq.
Greenland Express Iceland EHF, Greenland Express ApS sinnerlugu billetinik tuniniaasimasoq allappoq, nangillunilu.
- Aqqutsisut, eqqartuussissuserisullu aaqqiiniarlutik inuit taakku 15-it missaaniittut aningaasaataannik oktobarip tallimaani utertiffiginiarlugit sulipput, akissummi atsiorneqanngitsumi allapput.
- Ajuusaarnaqaaq aningaasaatitik suli tigusimanngimmassuk, Greenland Express Iceland EHF allapput.
Allagaqartup aqqa paasiniarlugu KNR saaffiginnikkaluarpoq, sulili akissutisinani.