Greenland Express maajip aqqarnganit timmisartuusseqqilissaaq
Timmisartortitseqatigiiffiup timmisartortitsisarnini ataasinngormat ammaqqippai.
Aalborgimit Kalaallit Nunaannut Greenland Express taamaallaat timmisartuussisinnaasimariarluni, Billundimit Københavnimiillu Kangerlussuarmut Narsarsuarmulluunniit maanna timmisartuussisinnaalerpoq.
Inuit amerlanerusut Kalaallit Nunaannut timmisartuunneqarsinnaanissaat periarfissinniarlugu Billundimit timmisartuussisalerniarlutik, Greenland Expressip pisortaanerata Gert Braskip oqaatigaa, Aalborgimiillu timmisartuussisoqartarunnaarluni.
AAMMA ATUARUK Greenland Express timmissartuusseqqilernissaa qanillisoq
Timmisartoq Airbus A320 matumani attartorneqarsimavoq, tassami timmisartoq taamaattoq 168-inik issimasoqarsinnaammat. Amerlanerusut taamaasillutik sullinneqarsinnaalerput, isorartunerusumillu angallanneqarsinnaalerlutik. Islandikkooqqaarluni angallassissarneq taamaalilluni aamma pinngitsoortinneqarsinnaalerpoq.
Gert Brask timmisartuussisarnernut tunngasunut allaaserisaqartartumut Check-in.dk-mut taama oqaluttuarpoq.
- Aalborgiminngaanniilli kingusinnerusukkut angallassisoqaqqittalernissaa anguniagaavoq, Gert Brask isumalluarpaluttoq Check-in.dk-mut oqaluttuarpoq.
Greenland Expressip Aalborgiminngaanniit angallassisarunnaarallarnissamik akerlianillu Billundimit angallassisalernissamik aalajangernera, Aalborgip timmisartoqarfiata pisortaanerata Søren Svendsenip tupigusuutigaa:
- Paasiuminaappoq, tassami Aalborgimit Kalaallit Nunaannut angallassinissaq periarfissagissaaqimmat. Billundilli timmisartoqarfianit angallassisalernissaannut atatillugu iluatsitsilluarnissaannik kissaappakka, Søren Svendsen Check-in.dk-mut oqarpoq.
AAMMA ATUARUK Inuussutissarsiortut Jyllandip avannaaniittut Greenland Expressip pakatsiffigai
Billundimit Nunatsinnut silaannakkut angallassisalernissaq ukioq manna maajip ulluisa aqqarnanni ammarneqassaaq, oktobarillu naanissaata tungaanut ingerlanissaa naatsorsuutigineqarluni. Tassami aasaanerani angallannermi pilersaarutit taamaalinerani naammassineqartarmat.
