Greenland Express aallartissinnaanngikkallarpoq
Danmarkimit Island aqqusaarlugu Nunatsinnut angalanermi piffissat aallarfissat akiillu Greenland Expressip sapaatip-akunnerata massuma ingerlanerani saqqummiuttussaagaluarpai, tamannali unitsikkallarneqarsimavoq.
Timmisartortitseqatigiiffik Hollandimeersoq Silver Tiger Aviation pilersaarutinillu aningaasaliisartut Delta Capita, Tuluit Nunaanneersut, Greenland Expressip piviusunngortinniarnerani suleqatigineqarput, suleqatigiinnerli maanna kipitinneqarsimalluni. Atuagassiaq Check-in.dk nittartakkamini taama allaaserisaqarpoq.
Greenland Express Ltd.-p Tuluit Nunaanni pisortaa Neil Nagarkar ingerlaannartumik soraarsinneqarpoq, suliffeqarfillu ingerlaannartumik aamma matuneqarluni. Gert Brask Check-in.dk-mi ilaatigut allappoq.
Gert Braskili tunniutiinnarumanngilaq. Ingerlatanimi Greenland Express Holding aqqutigalugu timmisartortitseqatigiiffimmik pilersitsinissani suli suliniutiginiarpaa.
Aningaasaliisut nutaat suleqatigalugit timmisartortitseqatigiiffiliorniarpoq, Hollandimiummi Denim Air suleqatigalugit timmisartortitseqatigiiffik oktobarimi novembarimiluunnit piviusunngortinnialersaarpaa.
- Aallartitsiniarnermi kinguaattooqqittoqarnera soorunami ajuusaarutigaarput. Aningaasaliissutissatut neriorsuutigineqartut tunniunneqanngillat, akiitsukkali akilereerpakka, Greenland Express Ltd.-ilu Londonimiittoq matuarput, Gert Brask oqarpoq.
Greenland Expressip piviusunngortinniarneqarnera ukiup ataatsip missaani maannamut ingerlasimavoq, piviusunngungajalersorlu qasseerpassuariarluni oqaatigineqartarluni. Piviusunngussanersorli suli ilisimaneqanngilaq.
Maanna suleqatiginiakkat Denim Air Issittumi timmisartuussisinnaanissamut akuersissummik suli tunineqarsimanngillat, Kalaallit Nunaannut Kalaallit Nunaanniillu angallassisinnaanissamut akuersissummik suli tunineqarsimanatik.
Angallassisinnaanissamut qinnuteqaat Angallannermut Aqutsisoqarfimmut aningaasaleeqataasut peqatigalugit tunniunneqarpat angallassisinnaanermut akuersissut pissarsiarineqarsinnaassaaq.
