Great Greenlandimi ilusilersuisartoq: Puisit amiinik atisaliat pisiniarfinni nalinginnaasuniilissapput
- Puisit amiisa atisaliarineqarlutik atorneqartarnerat nutarterniarpara. Tassami puisip amia atisaliaralugu pitsassuuvoq. Taamaattumik atisat amernik ilusilersukkat ullutsinnut naleqqussarnissaat siunertaraarput, Great Greenlandip atisanik ilusilersuisartuisa pisortartaavat, Jesper Høvring, taama oqarpoq.
Taassuma ikiortaasalu puisit amii atorlugit atisaliaat siulliit, Københavnimi atisanik takutitsinermi unnugu pisussami takutinneqartussaapput.
Jesper Høvring KNR-imut oqarpoq, nunarsuatsinni atisanik takutitsinerni, puisit amiinik atisaliat ukiuni kingullerni tusaamanerlunneqarlersimasut, puisit kalaallinit piniarneqartarneri aamma qanganisarpasippallaalersimaneri pissutaatinneqarlutik.
- Puisit pillugit takorluuisarnnerni eqqarsaatigeqqajaanartarpoq taakku kalaallinit atisarineqartarneri aamma 1970-ikkunni atisanut eqqaanartinneqartarlutik. Tassalu taama eqqarsartarneq allanngorteriarniarparput, Jesper Høvring oqarpoq.
Puisit amiisa soqutigineqarunnaaraluttuarnerinut pisiariumaneqarunnaarnerannullu pissutaanerpaanut ilaapput, EU-mut puisit amiisa eqquteqqusaajunnaarneri aamma canadamiunit puisit piaraasa piniarneqartarneri tamassumunnga pissutaaqataalluinnarlutik.
Tamakkulu tassa allanngorteriagassat ilaat. Taamaaliornermi Great Greenlandip paasititsiniutigissavaa puisit amiisa atisaliarineqartarnerannut atatillugu, puisit piniagaaneri nungusaataanngimmata.
- Puisit piniagaanerannut atatillugu taakku nungusaataanngitsumik piniagaaneri oqaluttuarinissaat pingaaruteqarpoq. Aamma puisit amii atorlugit atisaliat puisi tamakkerlugu atorluarneqarneranut ilapertuutaaginnartoq oqaluttuarissallugu pingaaruteqarluni, Jesper Høvring oqarpoq.
Puisip amianik atisaliat silami atugassiaannaajunnaarlugit atisanik muteernernik atuisartunut atisaliarisarnissaat aamma pingaaruteqartoq, Jesper Høvring oqarpoq.
- Atisanik mutinik ilusilersuisarnerput maanna atisaliatta takutinneqartussat uppernarsassavaat. Tassa atisat Europami pisiniarfinni takuneqarsinnaasut assigalugit pitsaasunik atisaliortarnerput takutissagatsigu. Oqaasinnaaqarpugullu tassa puisit amiinik atisaliat ammit atorlugit pisiniarfinni kisimi pisiarineqarsinnaassanngillat pisiniarfinnili tamani pisiarineqarsinnaassallutik, Great Greenlandip atisanik ilusilersuisartortaava, Jesper Høvring taama oqarpoq.
Københavnimi atisanik takutitsinermi ippassaq pisumi Great Greenland aamma takutitseqataavoq.
