Great Greenland siuariartoq
Ammerivik ukiorpaalunngortuni amigartooruteqartarsimasoq, 25 millionit koruuninik ukiup siuliani amigartooruteqarpoq, pissutsilli ukiormanna allaanerulersimapput.
Tassalu Great Greenland millionit affai sinnilaarlugit maanna sinneqartooruteqarpoq.
- Amernik tunisaqarluarnissarput aningaasartuutittalu ikilinissaat sulissutiginikooqaagut, taassumalu saniatigut ulluinnarni ingerlatsinitta pitsaanerulersinnissaa ukkatarinikuullutigu, Great Greenlandimi pisortaq Ditte Sorknæs oqarpoq.
Great Greenland 2015-imi 25 millionit koruuninik amigartooruteqarpoq, ukiormannali 633.000 koruuninik sinneqartoorfiuvoq.
Great Greenlandip ataatsimeersuarnerani tamanna ualilluinnartoq saqqummiunneqarpoq.
Ammerivik naapertorlugu sinneqartoorneq pivoq, naak amminik pisiortorneq tunisaqarnerlu aatsaat taama appasitsigigaluartut.
Great Greenlandillu pitsaanngitsumik ineriartorneq killormut saatsippaa, ilaatigut ammit suliarinerinut aningaasat ikinnerusut atorlugit puisillu amii toqqorsivimmiittut amerlassusaat affaannanngorlugit ikilisillugit.
- Ileqqaarutit amerlanerpaat suliffeqarfiup iluani sipaarutaasimasut, Ditte Sorknæs oqarpoq.
Ammeriviup ukiumoortumik nalunaarusiaata inernera naatsorsuutigisamit fem millionit koruuninik appasinneruvoq.
Taamaattorli iluanaarutit naatsorsuutigisamit 1,8 millionit koruuninik amerlanerummata, Great Greenlandimut tamanna isumallualersitsivoq.
- Isumaqarpunga tamanna siunissamut isumallualersitsisoq. Namminersorlutik Oqartussanut kiffartuussinissamik isumaqatigiissutigut suli pinngitsoorsinnaanngilagut. Ataatsimulli isigalugu pitsaasumut ingerlavugut, taamaammat isumalluarpunga, Great Greenlandimi pisortaq Ditte Sorknæs oqarpoq.
