Kalaallit Illuutaat nuuttunik nalunaarsuiniartut
Kalaallit Danmarkimiittut pillugit paasissutissanik sukuuminerusunik peqalernissaq, Danmarkimullu nuunnermut atatillugu assigiikannersumik tikilluaqqusaasalernissaq siunertaavoq, Danmarkimi illoqarfiit annerit ilaannut nuunnermi assigiikannersumik paasissutissaataateqalernissaq anguniarneqarluni. Kalaallit Danmarkimi Illuutaat, tusagassiuutinut taama ilaatigut allaaserisaqarput.
- Danmarkimut nuukkuit Kalaallillu Illutaasa ilaannukaruit assigiinngitsorujussuarmik ullumikkut tikilluaqqusitsisoqartarpoq. Suliffeqarfittut imminut pigisutut ullumikkut inissisimanerput pissutaaqataavoq, immikkullu tamatta periaaseqarnerput pissutaavoq, Jørn Holbech, Kalaallit Aarhusimi Illuutaanni pisortaq oqarpoq.
Aamma atuaruk Danmarkimi akuunerulersitsiniarnermut ikiorsiissutissat suli tunniunneqanngitsut
Kalaallit Illuutaasa ilaannut saaffiginninnikkut paasissutissanik tunniussisoqarsinnaavoq, saaffiginninnerlu soorunami nammineq kajumissutsimik tunuliaqutaqassasoq Jørn Holbechip oqaatigaa.
Atimik tunniussinngikkaluarluni nalunaartoqarsinnaasssaaq, assersuutigalugu paasissutissat inummut ataatsimut tunngasut, soorlu isertitat pillugit paasissutissat, ilinniagaq assigisaallu pillugit paasissutissat nalunaarsorneqarsinnaallutik.
Kalaallit Danmarkimi najugallit inuuniarnikkut atugaat pillugit sukumiinerusut pigineqarsinnaalernissaat neriuutaavoq, Danmarkimullu tikittut arlaatigut ikiorserneqartariaqarnersut pillugit paasissutissat sukumiinerusut pigineqalernissaat aamma neriuutaalluni.
Aamma atuaruk Nikingasoqarnera Kalaallit Illuutaasa iliuuseqarfigileruttorpaat
Kalaallit Danmarkimi akuunerulernissaat pillugu suliniutinut Folketingip 4 millionit koruuninik aningaasaliineraneersut atorneqarsinnaanissaat, Kalaallit Danmarkimi Illuutaasa kissaatigaat, tamarmik immikkut 200.000 koruuninik, taamalu katillugit 800.000 koruuninik atuisoqarnissaa takorloorneqarluni.
