AWG2016 Kalaallit AWG-imut apuupput
Issittormiut Nuummi aqagumiit unammiuaalissapput, timersoriallu kalaallit Nuup avataaneersut 111-nik ikinnerunngitsut Nuummut ulluni makkunani tikeraleruttorput.
- Sineriammiit tikerartussat amerlangaatsiarput, kisianni tassa naatsorsuutigaarput kingulliit tikereersimassasut tallimanngorpat martsip sisamaani.
Aamma atuaruk AWG-sertoqarnissaanut isumalluartoqaqaaq
Kalaallit Nunaanni Timersoqatigiit Kattuffianni pisortamut tullersorti, Lauritz Heilmann, aamma Nunatsinniit unammisussanut siuttuusoq, oqarpoq.
Taamasillutik kalaallit timersortartut Nuup avataaniit tikerartussat unammiuaarnissanut piariikannileqaat.
Kattuffiullu ujaminnattoornissamut neriuutaat ersereerpoq.
- Anguniagarivarput 70-inik ujaminnassalluta.
Basketballertartoqanngilaq
Nunatta 2014-imi unammiartortui Fairbankisimiit Alaskamiittumi 60-inik ujaminnassimallutik angerlamut uterput. Angusarissaarnerunissaq anguniarpaat, pilersaarutilli tamarmik iluatsinngillat.
Kalaallit Nunaanni Timersoqatigiit Kattuffia unammiuaarnerit kingulliit kingorna aalajangerpoq, Nuummi unammiuaarnerni basketballertartunik peqataatitaqarniarlutik, iligiilli sungiusaasuat siulitaasuallu Nuummiit nuummata pilersaarutit allanngorput.
- Deadlinitsinnillu assigiinngitsunut piareersaatitsinni qaangiuttoornitta kingorna tassa aaliangiussimavarput basketballiminngaanniit peqataasoqanngitsuussalluta.
Kalaallit Nunaanni Timersoqatigiit Kattuffianni pisortamut tullersorti, Lauritz Heilmann Bibi Nathansenimit oqaloqatigineqarpoq.