Thorning-Schmidtip apeqqarissaarfigineqartarnera nunatsinnit peqataaffigineqartalissasoq
Inuit Ataqatigiit sinnerlugit Folketingimut ilaasortap Johan Lund Olsenip allattaa taama allaaserisaqarpoq.
- Periarfissaq taamaattoq piviusunngorsinnaanngitsoq aallaqqaammut isumaqarpugut,periarfissinneqarsinnaanngornerpullu tusaratsigu soorunami nuannaarutigeqaarput. Statsministerip Folketingimi partiit siuttuinit apeqqarissaarfigineqartarnerannut Atlantikup Avannaani ilaasortat peqataasarsinnaanissaannut partiitta siulittaasuata Sara Olsvigip Folketingimi ilaasortaanermi nalaani Doris Jakobsen (Siumut) savalimmiormiullu ilaasortaatitai peqatigalugit ilungersuuteqarsimanera nuannaarutigaara. Qaammatillu pingasukkuutaarlugit peqataasarsinnaanissatsinnik periarfissinneqarsinnaanngorpugut, tamannalu nuannaarutigaara, Sara Olsvigip taartaa Johan Lund Olsen oqarpoq.
Folketingimi ilaasortat Atlantikup Avannaaneersut statsministerip apeqqarissaarfigineqartarneranut peqataasarsinnaanissaat, Folketingip siulittaasoqarfiata aalajangernikuuaa.
Statsministeri marlunngornerit allortarlugit apeqqarissaarfigineqarsinnaavoq. Partiit naalakkersuisuutitaqanngitsut siuttui tassani apeqqarissaarsinnaasutuaagaluarput, decembarilli ulluisa aappaanniit tamanna allanngortinneqalaarluni Atlantikup Avannaani ilaasortanit peqataaffigineqarsinnaanngussaaq, allaassutigiinnassallugulu qaammatit pingasut ingerlareeraangata aatsaat apeqqarissaarsinnaanissaat.
Statsministeri apeqqarissaarfigineqaleraangami nassuiaammik saqqummiusseqqaartarpoq, sivisunerpaamik minutsini tallimani saqqummiusseqqaartarluni. Taamaalereeraangat partiip naalakkersuisuutitaqanngitsup annerpaartaata siuttua apeqqarissaarnissamut minutsinik marlunnik tunineqartarpoq, statsministerillu sivisunerpaamik minutsit marluk atorlugit akissuteqartassalluni. Atlantikullu Avannaani ilaasortat maanna tassa apeqqarissaarsinnaalissapput, marloriarlutik aperisinnaassapput, sivisunerpaamilli minutsimik ataatsimik sivisussuseqassalluni.
- Ullorsiutini krydsileereerpunga, statsministerilu kinguneqarluartussamik toqqaannartumik oqaloqatigisinnaanissaa neriuutigalugu, Johan Lund Olsen, Inuit Ataqatigiinnersoq, oqarpoq.
