Grønlandsbankimik atuineq akitsorpoq
Grønlandsbankip atuisunut sullissinermini akiliutigititaa ullumimiit allanngorpoq. Tassa karsini automatini kiisalu pisiniarfinni hævekorti atorlugu aningaasanik tigusiniarluni atuinermi akit qaffapput.
Grønlandsbankimik atuisut atuinerminnut akiliutaat ullumimiit atuutilersumik qaffapput.
Karsimi aningaasanik tigusineq ataaseq 20 kroneqalerpoq, automatini tigusineq ataaseq 3 krone 75 øre-qalerluni, kiisalu pisiniarfinni hævekoortimik atuineq ataaseq 2 kroneqalerluni. Taamaasilluni hævekortimik qaammammut atuinerit amerlappata hævekortimik atuinermi akiliutigitinneqartumut nutaamut annertunerusumik akiliisalernissaq naatsorsuutigisariaqarpoq.
Kontomik naliginnaasumik qaammammut akeqanngitsumik kontollit Bankip aningaasanik tigusisarfiini automatini qaammammut marloriarlutik akeqanngitsumik tigusisinnaalerput, marlunnik amerlanernik automatinik atuinerit sinneri 8 kroneerutaasassallutik. Akeqanngitsumik kontoqaraanni karsimi tigusineq ataaseq 40 kroneqalerpoq. Pisiniarfinni Akiliutip atornerani akiliutigitinneqartartoq aamma qaffappoq, tassa akeqanngitsumik kontoqaraanni hævekorti atorlugu tamatigut pisiniarfinni akiliineq ataaseq 4 kroneerutaasalissaaq.
Tamatuma saniatigut hævekoortimut atuinermi qaammammut aalajangersimasumik 4 kroneertartunut karsimi tigusineq ataaseq 20 kroneqalerpoq, hævekorti atorlugu automatini tigusineq ataaseq 3 krone 75 øreqalerluni aammalu hævekorti pisiniarfinni akiliineq ataaseq 2 kroneqalerpoq.
Grønlandsbankip atuisunut sullissinermini akiliutigititaasa qaffannerat akiliutigitinneqartut sullissinermi aningaasartuutinut naleqqussarneqarnerat peqqutaasoq Grønlandsbankip pisortaa Jesper Flensted oqarpoq.
Ilaqutariit ataatsimik kontollit 25.000 kronet sinnerlugit bankimi ileqqaagaqarunik atuinermut akiliutikinnerussapput. Tassa bankimi 25.000 krone-uteqaraanni karsimi quleriarluni akeqanngitsumik tigsusisoqarsinnaavoq, automatini 40-riarluni akeqangitsumik aammalu pisiniarfinni 75-seriarluni akeqanngitsumik hævekorti atorlugu akiliisoqarsinnaalluni.
- Inuiaqatigiinni attaveqarnermik kiassarnermik, imermik innaallagissamillu atuinermi akigititaasunut sullissinermi aningaasartuutit ilanngunneqartarput, taamatullu ingerlaneq Grønlandsbankimi aamma atulerpoq, tassa atuisunik sullissinermi akit sullissinerup aningaasartuutigineqarneranut naapertuuttut atulerput, Jesper Flensted oqarpoq.
