GrønlandsBANKENip naatsorsuutai pitsassuupput
Taarsigassarsisitsinerit qularnaveeqqusiinerillu 249,7 millionit koruuninik amerlisimallutik.
- Ukioq manna taarsigassarsititsinitta qularnaveeqqusiinittalu qaffassimaneri iluarusunnartorujussuupput, naak qaammatit pingasukkaat pingajuanni immikkut appariarfiusimagaluartoq. Kalaallit Nunaanni inuiaqatigiinni siuariartorfiunngitsup nalaaniimmat iluarusunnarpoq, aningaaseriviup pisortaa Martin Kviesgaard oqarpoq.
Inernerit pitsaasut aningaaseriviup pisortaata peqquteqartippai sullitat suliffeqarfiutillit amerlanerusut peqqutaallutik ingerlatsinermi tunngaviit nukittorsarneqarneri, sullitat pappilissanik nalilinnik niueruteqarneri taarsigassarsisitsisarfinniillu suliat aatsaat taama amerlatigisut malunnaatilimmik qaffassimaneri. Tamakku saniatigut aningaaseriviup pappilissanik nalilinnik nammineq uninngasuutai annertuumik iluanaarutaasimapput.
GrønlandsBANKENip sullitaminit annaasaqaatai suli annikitsuaraapput, aningaaseriviup taarsigassarsisitaannit 0,4 procentinik nalikilliliisoqarsimavoq.
Aningaaserivik naapertorlugu GrønlandsBANKEN siunissamut piareersimalluinnarpoq, Kalaallit Nunaatali siunissaata tungaanut qularuteqarnerulluni.
- Kalaallit Nunaanni aningaasaleeriaaseq qereqqalluinnangajappoq. Kalaallit Nunaat pillugu tutsuiginassuseq pisariaqartinneqarpoq. Suliffeqarfiit aningaasaliissuteqarnissaminnut tunuarsimaarnerat isumakulunnarpoq. Tamatuma uppernarsaatigaa Kalaallit Nunaata maannakkorpiaq sammiviata qularutigineqarnera, tamannalu ineriartortitsinermut tutsuiginartunik patajaatsunillu sinaakkusersuinissat qulakkeerniarlugit nutaanik naalakkersuisoqalernissaanut tikkuussineruvoq ersarilluinnartoq, Martin Kviesgaard nassuiaavoq.
