Grønlandsbankenip aallarnisaasunut nersornaasiuttagaa 2014 tunniunneqartoq
Maniitsoq El-Servicep suliffeqarfik ingerlatartik LED Solar Greenland Qaqortumiittoq aqqutigalugu seqernup qinngornerinik tigooraassutinik, kissamut pumpinik, aamma qullernik LED-inik ineriartortitsinermi ikkussuinermilu pingaarutilimmik suliaqarsimapput.
Inuussutissarsiornermut aningaasaateqarfik ukiuni qassiinngortuni inunnut suliffeqarfinnulluunniit suliamikkut immikkut suliniartunut, tunniusimasunut immikkullu maluginiagassamik iliuuseqartunut aallarnisaasunut nersornaasiisarpoq.
Nersornaat 25.000 koruuninik aningaasartaqarpoq.
Grønlandsbankip Inuussutissarsiornermut aningaasaateqarfiata siulittaasuata, Kristian Lennertip nersornaasigassanngortitsineq ima tunngavilersorpaa:
- Maniitsoq El-Service suliffeqarfittut namminersortutut takutitsivoq suliffeqarfik nutaanik aqqutissarsiorsinnaassuseqartoq aamma innaallagisserisutut nalinginnaasutut ingerlaannarunnaarluni aamma nukissiuutinik allaasunik suliaqalernissaminut sapiissuseqartoq.
