GrønlandsBANKEN-ip allakkat atorunnaarniarai

Allakkat najukkamut nassiunneqartaannarnissaat piumasarineqanngikkuni allannguuteqarnermut nammineq iliuuseqartariaqanngilaq. 

Netbank Mobilbankilu innuttaasut aningaasaqarnermut tunngatillugu aaqqiissuteqarfigisinnaasaannik arlalippassuarnik periariarfissaqartitsipput. Tamannalu GrønlandsBANKENimi atuisunut tamanut atuuppoq.

- Digitalimik atuinermi atuisut aningaasanik nuussinissamut, akiligassanik akiliinissamut, akiliutinillu nutaanik piniarnissamut kiisalu aningaasaatit akeqanngitsumik takusinnaanerannut periarfissaqarput, Maannguaq Berthelsen GrønlandsBANKENip oqarasuaatikkut sullissivianeersoq oqarpoq.

Allakkanut digitaliusunik atuilernissamut bankip aalajangiinera atuisunuinnaq sipaarfiunavianngilaq. GrønlandsBANKEN allakkanik nassiussinermut aamma aningaasartuutaarutissaaq.

- Allakkanik nassiussineq akitsornikuuvoq, taamaammat GrønlandsBANKEN allakkanut digitaliusunik atuilerniarpoq, Maannguaq Berthelsen oqarpoq.

Atuisut siornatigut netbankeqanngitsut, allakkanik nassitsisarnermik allannguuteqarniarnermik bankimit nalunaarfigineqareerput. Allagaq atuisunit qisuariarfigineqanngippat atuisut isissutissamik isernissamullu matuersaatissanik qaammatip tulliata aallartinnerani nassinneqassapput.

Bankimik atuisut netbankitaarnissamut qujaannarlutik pisarnertut nassinneqartarusukkunik bankimut aprilip aallaqqaataa nallertinnagu sianerlutik mailimilluunniit allakkamik nassiussillutik nalunaaruteqassapput.

Bankimik atuisunit 59.000-it missaanniittunit 500-it missaat netbankitaarnissamut naaggaarsimalereerput. Ukioqqortunerusullu netbankitaarusunngitsuusut, Maannguaq Berthelsen oqarpoq.