Assammik arsarluni nunarsuarmi pissartat kalaallit unammissavaat

Arnat arsarnissaannut makitsinerni taama makitsisoqarmat arnartatta nunarsuarmi pitsaanersat unammisussanngorpaat.

Cubami illoqarfiit pingaarnersaanni Havanami nunat assigiinngitsut aqqaneq marluk VM-imut anngunniutissapput, maajip 21-anniit 28-annut; tassani Kalaallit Nunaat Gruppe A-mut inissippoq.

Brasiliap unamminissaata saniatigut aamma Paraguay, Venezuela, USA aamma Puerto Rico gruppe A-miipput.

Aamma atuaruk Kalaallit arnartaat pitsaanerit sisamaattut inissittut

Anngunniulluni unamminerni kalaallit arnartaasa puertoricomiut nunanut allanut unammisartui ajugaaffigaat, USA-mulli unamminermi naligiiginnarput, naggataagullu pingajunngorniuunnermi taakkununnga ajorsarlutik.

Amerikap nunavittaani assammik arsarluni unammersuaarnerni aatsaavissuaq naalagaaffiit aqqaneq marluk peqataatitaqarput, tassani Brasiliap saniatigut pitsaanerit pingasut tullianik VM-ertoqarnissaanut ingerlaqqissapput, tamannalu decembarimi Danmarkimi ingerlanneqassaaq.

Gruppep aappaaniipput Argentina, Uruguay, Mexico, Cuba, Guatemala aamma Chile.